Vizzavona ci prupone unepochi punti da parte à passighjà. Trà quessi ci hè a Punta di l’Oriente chì atteppa sinu à 2112 m.

Quelli chì li piace à fà e spassighjate spurtive ùn tricanu à fà si le per tuttu l’annu. Ch’ellu fussi cù i scarpi di randò o cù e racchette !

Si parte à livellu di a crestula di fronte à i stazzi di i Pozzi. Custindi omu hà dui chjassi davanti à ellu: quellu di a Donna persa (quessa a passighjata hè faciule à fà si la in famiglia) è l’altru di l’Oriente. Da custindi sinu à in cima, ci vole à sequità a crestula è custì, è custì… è po custindi. Hè dura! Attenti chì à u pede di a cima, ci hè insignatu in rossu un chjassu ch’ellu ùn ci vole à sequità. Si tratta di a marca di u chjassu duv‘ellu piglia u trail di l’Oriente ! Una corsa in muntagna chì si face tutti l’anni.

Da ghjunghje sinu in cima, basta à sequità i cairns. Hè una bella passighjata cù un bellu panorama à 360 gradi. Nantu à una bella parte di u chjassu si vede ancu a Piaghja orientale. Ghjuntu quassù in cima, ci tocca à fà un ultimu sforzu ad attippà nantu à a rocca, ghjunghje à a croce è tuccà u puntu più altu di l’Oriente. Vultendu, si pò cuntinuà pè u chjassu di a Donna persa ; allonga à pena a passighjata ma permette di fà i dui chjassi !