Piantassi à u strettu
À tempu à u tempu chì ci hè
Capì a pacenza di a fumaccia
À u ventu, lascialli a so luci
Francà

U nivulu di Tchernobyl
Si hè firmatu in Italia
Quant’è Cristu « si è fermato a Eboli »
Tandu u silenziu
pò ancu essa innu ufficiali di a miseria

 
Donna
U velu di a to pena integrali
mascarighja stu mondu ingratu
carcu di rena inde l’ochji…
U Simun soffia in ogni disertu

Acquata di rena…
Avà hè impiastratu u me 4X4 BMW novu framanti
neru lustru
com’è tè
chì l’ai pulitu nanzi arrimani.
Ed hè bruttu torna da issa pula strana è straniera
è torna à metta i struscini da pulì u paraventu
è torna à fatti nittà
à tè chì mi piddi menu caru.
Lu sia cecu u sciroccu chì ficca in ugna locu
a so pulvariccia russa
Accidenti ad iddu è à quiddu
chì l’hà invintatu cù tutta a so merda ghjunta d’Africa

 
A cumedia d’austu si palesa à libecci
In lu sfrisgià di ventu
a tenda di rena s’arizza è s’affaccani ridoni
muzziconi di sigaretti senza fumu
spazzosi spazzati
ghjoculi scianch
puppatuli sdinticati
tocchi di pezzi
pezzoni
buttigli stappati
incruvattati di cart’igienica...
À a prima reffica cuntraria
s’intanani dinò
U ghjocu durarà
fin’à diventà pula
è sbiadiscia u ventu