Sa note blanda nos inganaiat a passizare
ca nos fimus aizu connotos,
torrende
e andende,
fintz’a su logu de s’abboju,
afaca a su penultimu luminu
nascheit un’emida dai sas laras tuas
su chizolu de s’amore nostru triuladu
un’emida chi franghet cadreas
e mujat ispijos retrovisores,
umpendemi buca e manos s’emida tua,
prellas minudas de sa note ingullidas totu
dai sa ‘uca abbramida tua
e gai foràneos, agateimis su sole
aparitzende sa mesa a ateros cumbidados.
Culvenaimus galu calunu segretu
galu, a narrere, in jaruras gai jaras,
unu logu o s’ateru, ca
sas tzitades nostras paren sas matessi.