è poi hè ghjunta a morte
à a mo età si deve esse pronti
i rami si tendenu pisii à a terra
ma hè drentu ch’ella trenneca a coscenza
di a fine -in veru ùn s’hè mai pronti
manc’appena- a vita si dibatte cum’è in una rete
è s’ingarbuglia in un niente l’ultimu filu
u fiatu, l’esalazione, hè cusì chì s’entre in a storia
à dì à voce alta l’ultime parolle di u libru
a preghera chì in l’intenzione
deve raghjunghje u scopu umile è sincera
cum’hè sincera a morte chì vene à piglià ti
è ùn prumette nunda di più ch’è sè stessa
è invece lampa u scumbugliu nantu à l’acque calme
cota chì palesa u ghjocu cuncentricu di i chjerchji
drentu à i quali si cunduce a nostra vita sana
digià cù tutte e griviglie di i vechji da scuntà
era eo ramu d’un ogliastru insetatu cent’anni fà
è oghje ala spezzata cum’è ossu m’hà mondatu
a scorza u cultellu di u maestru Sciola
sò avà l’imaghjina di Cristu
-altru ulivu- appesu à sta croce
è tù sì l’oliu chì vene da u mo fruttu
quandu era sempre arburu vivu :
ci ritruvemu inseme nantu à iss’altare
eo inalzatu pè u sempre
è tù à fà mi lume