Piuvia
sopra à e tombe viote
issa primavera di Pruvenza.
U sguardu
sopra à a geumetria di l’assenti,
in u silenziu
ascultavamu a voce di i nostri morti
è ci spaventavamu.
Quella parolla
chì si fece avanti davanti à e parolle
intricciata à vinca è à tristizia.
U pueta
à l’aguattu di u silenziu di l’eteru
di e parolle di l’omi mai capite.
Quellu chì, timurosu di u sensu, amava tantu
u rimore di e cose.
À ghjornu à ghjornu
turnemu à i gialli è grisgi di Pruvenza,
innamurati di l’acqua,
di u fiume di u tempu sopra à e tombe viote,
è i mughji di i vivi ammutuliscenu a gioia
di issa valle silenziosa.