puderiamu fà l’amore è ùn u faremu.

tanta notte ci separa
è avemu lacatu di tesse
l’intimità chì ci sustenia.

strascinanu l’ore à pian’terrenu.

u ventu muverà e rambelle
podasse à meziornu,
a suppa freta freta...

puderiamu fà l’amore è ùn u faremu.
ci hè tantu ingannu in u ragionu.
è l’acqua di a duscia hè cutrata.

avemu u focu, hè un pezzu, spentu male:
hà empiutu di fume tutta a casa
ed avà ci pianghjenu l’ochji.
À chì ci vede pensarà ch’è no ci tenimu.

ci hè tanta vita in u ragionu.ma eo è tù ùn faremu l’amore.

(Da u libru Setembre, 1990)