Limba e libros in su Museu Sanna

COMUNICADU



A pustis de sa presentada de su libru de Luis Sepùlveda bortadu in sardu "Istòria de unu cau marinu", s'Ufìtziu Linguìsticu de sa Limba Sarda e Catalana, de su Servìtziu Limba Sarda de s'Assessoradu Regionale a s'Istrutzione Pùblica, sighit cun sas presentadas “Limba e libros in su Museu Sanna”.
Su de tres addòbios est pro giòbia su 10 de abrile in sa sala cunferèntzias de su Museu Natzionale "A. Sanna" in carrera de Roma a sas chimbe e mesa de borta de die, pro sa presentada de su libru de poesias “Les mies mans” de Antoni Canu.
"Le mies mans", pro mèdiu de unu caminu in poesia, mìsticu e de ammaju, contat s'ammentu de s’antigòriu, cando si traballaiat in sos campos istende in mesu de gente e a manu nuda in su terrinu.
Antoni Canu est nàschidu in Otieri ma a 10 annos si nch’andat a istare a s'Alighera. Sa limba mama sua est su sardu ma, dae tando, su catalanu de s'Alighera si faghet sa limba sua printzipale, imparada sighende finas sos cursos de la "Escola de Alguerés Pasqual Scanu" e sas initziativas de s'Assòtziu Obra Cultural de l'Alguer.
At publicadu tres libros de poesias: "Poesies" (1995), "En l'arc dels dies" (2000) e "Nou Cant" (2007) retzende prèmios meda e reconnoschimentos a livellu natzionale e internatzionale.
Ant abèrrere sa presentada sos saludos de Gabriella Gasperetti, diretora de su Museu, sighida dae Cristiano Becciu, funtzionàriu de su Servìtziu Limba sarda. Giuliana Portas, de s'Ufìtziu linguìsticu regionale, at a moderare sa dibata. At a intervènnere Fàbio Solinas, Presidente de s'Assòtziu ÀndalaNoa e Dàvide Casu, cantadore saligheresu.
At a èssere presente s'autore de su libru chi at a lèghere sas poesias suas.
Totu sas initziativas promòvidas in Tàtari dae su Servìtziu Limba Sarda de sa Regione, pro more de sa grandu collaboratzione cun su Ministèriu pro sos benes e sas atividades culturales, servint pro valorizare sa limba sarda e sas variedades alloglotas de Sardigna.
S'addòbiu imbeniente de "Limba e libros in su Museu Sanna" at a èssere giòbia s' 8 de maju cun sa presentada de “S’istrumpa”, cun s'autore Piero Frau.