LA DIVERSITAT LINGÜISTICA
Cumenti è parè
LA DIVERSITAT LINGÜISTICA DE LA UNIO EUROPEA, ELS PARLARS,
LES SEVES GRAFIES I LES RELACIONS ENTRE ELLS.
Cù u libru và dinù un CD-A cù una canzona pè ogni cumunità linguistica.
Sinopsi
L’intenzione hè di fà vede a diversità è a cumplessità linguistica di l’Unione Europea. Venenu in seguitu i capituli, à famiglie linguistiche, secondu i rami d’isse famiglie è à gruppi di parlà. U libru hè limitatu à l’Unione Europea (è cuncretamente à i territorii eurupei di l’Unione) chì quessa hè u spaziu è u marcu puliticu duv’è no ci muvimu è chì ne femu parte istituziunale, vuluntariamente. Ë puru u libru si limita à cunsiderà e cumunità linguistiche autoctune, è chì sò eurupee da seculi, puru s’ellu ùn si limiteghja à un territoriu propiu circuscrittu, cumu a romaní, a jiddisch o l’armeniana.
Ci hè un’uriginalità propiu marcata cun l’appicciu à issu librone. Si tratta di a pussibilità à chì l’apre di sente ancu a voce d’issa lingua ch’ellu ammenta u linguistu! Di fatti un CD audio offre in illustrazione di a descrizzione, un paragone cantatu in a parlata cunsiderata è u libru presenta u testu scrittu in a lingua d’urigine è dinù in traduzzione catalana. Sò tutte canzone scelte pè a so qualità musicale è vucale, ma dinù Jaume Corbera hà vulsutu porghje à u lettore un assaghju chjarissimu, cù elucuzione propiu demustrativa.
Ci vole prpoiu à ringrazià u Prufessore CORBERA pè issu bellissimu è utilissimu travagliu. Di fatti, sò propiu scarse l’opere d’issa natura, à tempu scentificamente solide è forte, arrimbate à anni è anni di studii, usservazione, paragoni è analisi scentifichi è primurose in listessu tempu di purtà prufittu à tuttognunu chì si vole propiu mette in cunsunanza cù a parlata di una cumunità è u prugettu di un spaziu cumunu, l’Europa, da ritruvà, da cunnosce megliu, ma ancu da custruì!
Sarà propiu per quessa, a finalità citadina, chì l’autore ùn si stà inchjustratu in campu scentificu ristrettu. È tandu si vede cumu issu spezialistu di a linguistica è di a geugrafia linguistica di l’aghja rumanica insuchja u so libru di tutte l’altre discipline (sociolinguistica, storia, pulitica) necessarie da insignà u scopu: cunstruisce un spaziu novu in armunia cù e so logiche è baratti di sempre.