Versione :

Ducumentu
L'Alture di Bellezza

Site sicuri ch’è vo avete tuttu : l’aste di l’energia, una zucca in più (dice chì cù u bellu tempu hà fà caldu quassù!), i spechjetti è po a crema tutale? Cù u lume quì, micca chjachjare vè!

Và bè! Vecu ch’ellu ci hè propiu tuttu è cun voi, vecu chì ancu i soliti cunsigli ùn vale a pena. Alpinisti? Podasse innò, nè mancu appassiunati pè l’attippà, puru s’è vo ùn temite e cullate à l’à piccu… Innò, marchjatori in veru, cun quella unghjicula di sfida da mette valore à a issa surtitella. A scelta hè stata bona. A Corsica di l’alture hè propiu quella da sente si in bonu, arradicatu in u mondu è inalpellatu quassù, nantu à e cime più uriginale.

Ah ma è u sognu? A bellezza? A maraviglia da        tutte e bande, ùn vi ci site appruntatu chè ? Ùn và micca cusì chì vi lacate l’essenziale tandu...

Andate à passighjà, ma senza prudenza chì partite à capu logicu è fretu, cun orarii da rispettà è perfurmanze da fà. Attenti chì tandu ùn site micca prontu à sfidà l’alture di bellezza. Per d’altri chjassi anderà, ma quì po ùn si hè sicuri di avè u pede sicuru è u capu à sennu cun tutte isse maraviglie ingiru. Vi aspetta u sublime, vi aspetta! Vi ne gira u capu, vi ne taglia u fiatu l’ammirazione!  Affascinatu site, l’anche chì tremanu è a lacrima d’emuzione à l’ochji. U periculu ci hè in ogni locu cù issi precipizii turchini è l’onde di frundami in e fureste di larici è di faii verdi verdi. Videte quì, ùn sò micca nuli ma a petra rosula è turchina chì svapureghja; custì hè un vulcanu bruscu chì si hè impetrificatu pè u sempre è ne ribomba u mughju rozu cum’è quelli castelli chì ùn sò più. È po soli annigati in e borghe scure è luntanu, u mare, cù una vela chì ci imbarca u sguardu è si ne fughje...

È l’animale inalpellatu custì, nant’à sta zenna annivata: state fermu! Zittu! Ùn ansciate! Hè un simbulu hè ! In corsu hè femina è si chjama a Mufra: vole dì “Libertà”!

È fate casu ch’ellu ùn vi accadi cum’è e mane più spurgulate, quand’è vo avete marchjatu assai è ch’è vo fate l’arretta da rifiatà, à pusà nantu à qualchì pentone chì luce. Sottu, ciotta l’abissu di a valle, turchina à issa ora matuttina. U silenziu. A petturriccia chì bolle dopu à u sforzu, è po l’aria cutrata. À manu à manu un sussuru per aria. È vi sorte da a tippale trenta metri più sottu, l’altagna maestosa. Alisparta vi si empie tutta a valle...

È vi ne state custindi, cù u core chì batte à scimesca è cù u tremuleghju à dossu. Ancu à pena vi lampavate ancu voi, à piglià ne u volu...