A Corsica hè un paese di religione cristiana, è a populazione dà un'impurtanza maiò à certe pratiche religiose. A dumenica di l'Alivu indica l'iniziu di a settimana santa.

Dopu a benedizione di e palme chì si presentanu sottu a forma di crucette, di pesciu, di stele, accumpagnate di rame d'ulivu, s'urganizeghja a prucezzione tradiziunale seguidata di u ritu di chjusura è d'apertura di e porte cunnusciutu in a liturgia sottu à u nome di " d'attolite portas ". Sta ceremonia si passava tandu for a di a chjesa, oghje si face solu u giru di a chjesa. Dopu a benedizione di e palme, e famiglie appendianu e crucette in casa, in segnu di pruttezzione.

In Corsica, e ceremonie di u Ghjovi Santu è Vennari Santu sò sempre state festighjate cun fervore : altari spugliati, statue ricuperte d'una vela viuletta, a spinta di i cironi ne marcava l'iniziu. Da un puntu di vista ceremuniale, ste pratiche anu un puntu in cummunu : e prucezzione, chì ponu, secondu i lochi, cambià.
Tandu, si chjamava a trifuna, sta fila di penitenti, vestuti d'una pianeta bianca, incappuccinati, marchjendu u passu seriu, è cantendu u " Storpiato Misere ".

St'usi si facenu torna oghje, ghjè cù e ragane, bratachje, trapachje chì i zitelli annuncianu l'iniziu di l'Uffiziu di e Tenebre. Sta ceremonia si face in giru d'un candileru triangulare, cù 15 candeli. Dopu ogni salmu, un candelu hè spintu. Quandu l'ultimu, chì si trova in punta di u triangulu, hè spintu, a chjesa hè in u bughju, cummincianu allora i rumori di e ragane è di i bastoni.

In tempu di settimana santa, i vegetali sò assai ricercati : palme, fiore, granu è lentichje chì sò messe à germinà è piazzate davant'à l'altarini. Sò e cunfraterne chì perpetuanu e tradizione di a settimana santa, urganizeghjanu, dirigenu è cunducenu e prucezzione.

A Settimana Santa si compie cù a festa di Pasqua, sta resurrezzione porta e so feste è allegrezze, e case sò pulite, e fulighjine sò fatte, i mobuli spiazzati, tandu si pichjava annantu per fà fughje e forze di u male, a benedizione di u prete sarà fatta, i forni sò accesi per e preparazione è biscotti di Pasqua. Parechji " Alleluia " allegri risunanu in e chjese è sott'à e volte di i paesi…

Strattu da u situ di ADECEC Cervione

Un travagliu da Petru-Ghjuvanni Bresciani (Testu uriginale di Marie Amélie Racon, esciutu in francese in a rivista d'infurmazione culturale " A LETTERA ", Nu 10 , A Stampata, 1994)