À l’iniziu di u desertu di L’Agriate, vicinu à u campu di tiru di Casta, ci hè un situ maravigliosu chì tene e vistiche di dolmens chì sò in data di u neoliticu. Sò tombe cullettive aperte in davanti è supranate da una teghja orizuntale, cuperte cù un tumulu chì oghje ùn ne fermanu più chè petre spaperse à l’intornu.

I dui dolmens sò luntanu unu da l’altru, è si trova dinù sopra à locu resti di cascioni, tombe aperti nantu à u sopra. Pare ch’elle ci fussinu ancu e case è forse saranu state aduprate ancu dopu. L’inseme di u situ hè interessante quant’ellu hè stupendu è ci si ghjunghje propiu faciule. Una passighjata faciule chì attraversa a machja è permette di scopre un pezzu di a storia isulana.

Ma issi lochi sò dinù carchi à fole è spicca una legenda ingiru à u nome d’issi dolmens. Isse duie custruzzione, una più chjuca è l’altra più maiò, sarianu in fatti e case di un orcu è di a so mamma. (Casa di l’Orcu è di l’Orca). L’orcu falava in furia isse pendite à troncacollu è a ghjente di u locu li ne vulia assai. Hè cusì ch’elli decisenu di agguantà lu è fà lu prigiuneru mettendu a pece in i so stifali. L’affare picciò cum’elli avianu pensatu è l’orcu pensò di cumprà a so libertà palisendu u secretu di cum’ellu si face u brocciu. A mamma l’avertì di ùn fà la ma ellu dete quantunque a sosula di u brocciu ma i paisani cappià ùn lu cappionu. Tandu fece a pruposta di spiicà li cumu fà a cera cù u seru di u latte.

Malgradu tutte isse guaranzie l’omi ùn rispettonu quant’elli li avianu prumessu. Si piglionu isse sosule è ammazzonu l’orcu è a mamma…

Ùn hè tantu bellaghja a manera ch’ella finisce a storia ma ùn impedisce di tichjà si di tutte isse liccature speciale fatte cù u brocciu, o puru di brocciu senza nunda…