I paesi di u Nebbiu trà sacru è prufanu
Una passighjata da Rapale à Soriu, luntanu da i chjassi praticati, scuprendu un patrimoniu chì si merita l’avvinta
![](https://interromania.com/sites/default/files/styles/image_548xx/public/dscf2101.jpg?itok=zk9TzFZc)
"Trà sacru è prufanu." Cusì si chjama un chjassu longu trà e cumune di Rapale, A Pieve è Soriu è chì scontra strada facendu punti d’interessu diversificatu: cappelle, stazzi è altre petre anziane, senza cuntà i belvederi. Cusì si ne scopre una cria di più nantu à U Nebbiu (in Cismonte) è cum’elli ci camponu l’abitanti longu à a storia.
A passighjata hè longa è si pò dinù fà in duie volte da pudè propiu prezzà i varii lochi (Rapale - A Pieve / A Pieve - Rapale è A Pieve - Soriu / Soriu - A Pieve). Si parte da Rapale è, pè esse più precisi, da a chjesa Santa Maria Assunta, una lascita pisana; da custindi, un scrittoghju presenta u percorsu è i so punti di primura. D’altronde longu à u chjassu ci sò i picculi pannelli d’infurmazione. Di prima si piglia à cullà è dopu si entre in u boscu. E stagione, tutte sò bone à chì vole scopre u locu (i ritratti, l’emu fatti di ghjennaghju).
A prima cosa interessante hè una piccula cappella rumanica di u XIIIu seculu in cor’di ristaurazione: San Cesaru. Hè stata classificata munimentu storicu in u 1840. A so particularità hè chì hè fatta in petra serpentina, issa petra verde chì in issi lochi si trova in quantità è chì era sculpita in modu curatu assai. Issa cappella omu a cunsiderava cumu piccia di San Michele di Muratu.
Dopu à issa arretta, si ripiglia à cullà in direzzione d’una curnice accinta di machja corta corta è chì offre una vista d’incantu nantu à e piaghje di u Nebbiu. Da custindi si vede a ritenuta di Padula è a cità di San Fiurenzu luntanu, u Capicorsu si palesa sottu à un angulu novu. Marchjendu ci vole una bella ora da ghjunghje à u paese di A Pieve.
Da custindi, si torna à marchjà sottu à una machja à bastanza alta. U chjassu si sparte ma à l’ultimu si ghjunghje in una spezia di piaghja chì ci sò pagliaghji à bastanza da fà l’impressione ch’ellu saria un paese abandunatu. U chjassu tira avanti è si vede luntanu a croce in cima à u San Damianu. À manu dritta si vede u paese di Pieve sottu à un angulu novu. Di fronte, si stendenu e pianure di u Nebbiu sin’à u golfu di San Fiurenzu. À manca, a muntagna taglia l’orizonte. Di latu, si vede a prossima tappa di sta passighjata : Soriu. Si ghjunghje in issu paese arruchjendu per l’amanduli. Si passa vicinu à a cappella Santu Antone chì hè stata alzata à u XVIu seculu è risturata in u 2002. Un sistema propiu astutu d’irrigazione cun canalette traversa u paese sinu à u lavatoghju è piglia l’acqua d’una surghjente chì sorte daretu à a cappella. Dopu francatu à Soriu, si chjode issu giru vultendu ver’di Rapale. Nantu à iss’ultima tappa, eccu torna a cappella di Santa Margherita classificata munimentu storicu in u 1936. Benchè spiccata da u paese per seculi è seculi fù a chjesa paruchjale di Soriu. Hè stata risturata in u 1992. Hè un viaghju in pienu core d’issi paesi è di a so storia da sapè ne sempre un pocu di più in quantu à a manere è l’usi di u campà in isse microregione longu à i seculi.