DA A PUESIA

TRÈ PUETI DI PETTU À A SO LINGUA È A SO CREAZIONE

Scontri di 29.05.2014

PÈ A SIMANA DI A LINGUA

Quandu si pensa i militanti, scrittori, attori culturali è altri, attenti à rinfurzà u postu di a lingua corsa in a sucetà, a cuesione di u gruppu, l'azzione creativa, u discorsu di l'indiatura è a vuciata i facenu cumu s'elli fussinu tutti listessi. A diversità di l'itinerarii, di a furmazione, e scelte è e primure individuali, i modi persunali di andà ver'di a creazione, INTERROMANIA l'hà vulsuti fà spiccà per mezu di pueti spessu incartati presenti ind'è parechje antulugie, publicazione altre è baratti artistichi.

Cù e so risposte dirette è sincere, Patrizia GATTACECA, Ghjacumu FUSINA è Alanu DI MEGLIO danu à tuttognunu un messagiu senza enfasi nè discorsu inutile. U corsu hè vivu è pruduttivu, à dispettu di u so statutu è di tante pediche! Sò percorsi di spressione, di furmazione è di creazione sputichi è dinamichi. A lingua è a cultura corsa ci anu un postu predilettu per via chì isse persunalità ne facenu à tempu un bilanciu pusitivu per sè stessu è pè u campà inseme. Senza mascara à l'ochji, senza nustalgia nè pessimisimu alcunu. Cù a forza ch'ellu hà u piacè d'esse. Un sintimu una cria stranu quantunque, trattendu si di creatori in lingua minurizata. È custì, di solitu, ci hè più lamenti chè cuntentezza, ùn hè vera?