Barbara CASSIN ci invita cù u so libru La Nostalgie  à cusì bellu viaghju trà mezu à lochi è linguaghji di u Mediterraneu. A ragiunata fatta stu pocu à l'Università di Corica, cun presentazione di l'autore da Francesca Graziani, hè stata umagiu à l'uspitalità corsa è riflessione in quantu à un sintimu, un statu ammintatu spessu ma cunnisciutu male, a nustalgia, vista è riflessa in u so raportu cù i lochi è e lingue.

Francesca Graziani insegna per principià u ritimu di u libru:

1) Si parte da Ulisse è si riflette in quantu à "nustalgia", un termine chì ùn hè anticu mancu à pena è grecu sì, ma di gramaticante è scentificu chì discrive u sognu d'Ulisse attaccatu assai à a so isula capruna è chì ùn hà chè un sognu solu: vultà ci!

2) Si riflette dopu in quant'à Eneiu esiliatu è chì sbarca in Italia: hè fundazione, un esiliu fundatore.

3) Dopu si passa à Hannah Arendt è a relazione ch'ella avia a filosufa cù a so lingua, l'alemanu, mentre ch'ella fù esiliata in i Stati Uniti.

Issu parcorsu custì hè dinù una riflessione nantu à a sperienza fatta da a cunferenzera ella stessa da trentacinque anni ch'ella stà una parte di l'annu in Corsica.

Pè issa cunferenza squisita, ricca è prufonda, dumandemu di lampà si à leghje u libru è ammintemu quì solu una struttura di fundaliziu di u discorsu di a filosufa, e duie scene matriziale di a nustalgia:

1. Ulisse chì volta in casa soia dopu vinti anni fora è si face puru ricunnosce da a moglie; u segnu di ricunniscenza hè u so lettu, zuccatu in un alivu arradicatu in a terra.
2. Ghjuntu  custì, ci hè una primura sola: parte torna sinu à ghjunghje in un puntu chì nimu vi ricunnosce, un locu cusì luntanu chì a ghjente "ùn sanu chì ghjè un battellu nè à ch!ghjovanu propiu i remi, postu ch'omu i cunfonde cù una pala da piglià u granu.

Una metafora pudente chì insegna a natura cumplessa di varia di a nustalgia.