Pè andà subitu à cunsultà i ducumenti, cliccate nantu à e parolle scritte in rossu

Salute,

Sta volta,

RIENTRATA CCU: Presentazione è cunferenza stampa

Ghjorni fà, u serviziu di u CCU hà fattu a so rientrata. I rispunsevuli anu presentatu a prugramazione di l’annu 2013-2014, cun l’affollu di e varie cumpunente di l’Università di Corti. Thierry-Antoine SANTONI, vice presidente di u C.E.V.U, hà dettu quant’ella hè di primura l’attività è a creatività culturale per l’Università è a squatra chì a porta; Sylvia FLORE, Gaëlle PIFFERINI è Philippe ROCCHI rapresentavanu u Serviziu Cumunicazione chì impuntella è allarga u ribombu d’isse azzione; Vannina BERNARD-LEONI, direttrice di a Fundazione purtava testimunianza di un’iniziativa chì sviluppa un partenariatu impurtante cù u CCU, l’altri servizii è culleghi affollanu l’andatura culturale.
A squatra di u CCU hà sviluppatu a presentazione di u prugettu cun Luisa MINICONI (Rispunsevule amministrativa), Christelle MARTINEZ (secretariatu), Niculaiu FRESI (regia). Ghjacumu THIERS hà presentatu in particulare a funzione di u munituratu-studiante cù e sei munitrice chì accumpagnanu l’azzione longu à l’annata: ADAMI Maria, BOCHEREL Nolwenn, HOMAT Wyma, LENZINI Claudia, MORACCHINI Angelica, ROSSI Elodie.
I quant’à i dui prugramatori anu presentatu i spettaculi di CORSIC’ARTISTI (Niculaiu SORBA) è CORTINSCENA (Ghjuvan Petru GIUDICELLI).

I MISGI: Una lettura di a cità pruposta da Patrizia GATTACECA

A puetessa cantarina face un pezzu ch'ella cunnosce à G.Thiers. A critica ch'ella presenta mette in risaltu a lettura "citadina" di l'universu duv'ella si svolge l'azzione d'issu quintu rumanzu di u scrittore bastiacciu... Bastiacciu, ma chì ùn si dice di Bastia in issu libru. A lettura di Patrizia face vede cum'ella intende di unisce arradichera è trasversalità, a scrivitura di I Misgi.

DA CATALOGNA: Jordi BUCH presenta La última mujer

Jordi BUCH ci dà e nutizie di Antoni CORSARCATA, chì ellu hè a parte catalana di Antoni CORSARCATA u “giovanu rumanzeru mediterraneu” chì scrisse cun G.Thiers è A.Arca è publicò pochi mesi fà Quandu sò spenti i lumi (ALBIANA-CCU, 2012).
Jordi BUCH I OLIVER (Mataró - Barcelona, 1957) hè scrittore, giurnalistu è musicistu. Hà publicatu in i Stati Uniti, Israele, Italia è Argentina.
Travaglia in a stampa scritta è i media: Correo Catalán, Avui, Canal 13, è cet... Trà altre publicazione, Per les vores de dues pells (La Busca Edicions, 2004), A trenc d’Alba (La Busca Edicions, 2006), Montilla de emigrante a presidente (Europa Viva, 2008), Història misteriosa de España y Portugal (Europa Viva, 2008), Història d’Elena (Alill, 2010), Massa gent a dins l’armari, (Alill, 2010).
Jordi BUCH hà presentatu u libru publicatu à Parnass Ediciones cù a scrittora uruguaiana Ana SOLARI. La última mujer conta a storia accaduta in u 1959 di Manel, scittore catalanu, una giovana veduva taliana. Manel, dillusu da u so matrimoniu è cuntrariatu da a Spagna franquista, parte in Tuscana à circà a donna ch’ellu a sunniatu da tanti mesi. L’hà da truvà in a piccula cità di Lucca è subitu subitu... s’innamoranu tremindui.Tanti anni dopu, un Manel invechjatu assai è solu solu, conta i so ricordi, una passata chì l’hà cumossu tantu...
http://www.youtube.com/watch?v=-2-6K76ni9U&feature=youtu.be&hd=1

DA SARDEGNA : L'ARTE DI SAN SPERATE

Mandati da l’amicu Mariano CORDA, artistu è registu è attore di Sardegna chì da un bellu pezzu travaglia cù a Corsica si sò affaccati in Corti Manuela SERRA è Daniele SPIGA di u studio Officinevida di San Sperate (Cagliari) a cità cusì artista ch’ellu messe à l’onore tanti anni fà Pinuccio SCIOLA è e so rializione di nomina internaziunale in u paese di e MURALES è di e LITUFUNIE.
Vincitori di un premiu eurupeiu issi dui giovani ingenieri anu fattu u so giru in Corsica à filmà siti è stallazione in a tematica di l’Acqua. À l’università anu pigliatu cuntattu cù u CCU, a Fundazione è u Dipartamentu di l’Arte è anu fattu a visita di i lavi filmendu l’acqua è i siti di Melu è Capitellu.
Si pò truvà un bellu riportu di u quatru eurupeiu d’issa azzione nantu à parechji siti di San Sperate è in particulare quellu dedicatu à un prugettu chì adunisce parechji gruppi di giovani: http://yac.paesemuseo.com/