Moldoveanu 

Moldoveanu 1: Vi ramintate quand’emu fattu quellaa scappatella in e muntagne slovache ? È bè, oghje ci ne andemu un pocu di più à l’oriente è cambiemu di paese, da scopre a Rumenia, è prufittà ne per attippà ci in cima à a so muntagna più alta. Quessa hè u Moldoveanu, litteralamente « U Moldavu », chì culmina à 2544 metri. Hè bucolica a partenza d’issa spassighjata è principia in circulu verde verde, vicinu à una capanna chì pò ghjuvà per aggruttà si ci.

Moldoveanu 2: Ma prestu prestu u chjassu atteppa propiu, di prima in furesta duv’è no scuntremu un pastore chì si ne fala da quassù cù i so sumeri, da rifà e so pruviste quaiò in piaghja. Dopu si face più scarsa a vegetazione. Ancu di grazia ci hè una bella spiscia chì ci porghje un’arretta cuntemplativa, da ripiglià fiatu una cria .

Moldoveanu 3: Più insù, una prima piana ci ramenta i pozzi corsi, alimentati da un fiumicellu cantarinu. Dopu, u chjassu atteppa torna è passa à u pede d’un lavu , u Lezerul trianghuilar è po’ dopu colla dinù sin’à una prima foce chì porghje una vista chì ciotta à l’inghjò nant’à un’altra vanga. Ci hà da vulè à fà torna unepochi sforzi da camminà quassù in cresta prima di ghjunghje in cima in cima. A tradizione vole ch’una volta ghjunti à issu puntu custì, i rumeni azzinchessinu una bandera di u so paese ch’elli anu avutu cura di cullà si cun sè è ci marcanu nantu a data di a cullata è po’ duie parolle. U ritornu si face cuntinuendu à viaghjà nant’à a cresta, ciò chì permette di scopre un’infilarata di parechji lavi bellucci cù i so culori sfarenti. Bellissima surpresa quella spassighjata nant’à u tettu di a Rumenia.