PRIMA DI TUTTU:

Bon annu È bon capu d’annu
Pace È salute per tuttu l’annu

Bon principiu è miglior fine...

    À puntu pè u principiu una stonda di qualità è chì annunzia un rigalu: i cunniscite l'azulejos purtughesi?

   Sò propiu magnifichi, ùn hè vera? È bè, Rosa Alice BRANCO, a nostra currispundente è amica puetessa di Aveiro è Porto ci ne hà da offre unepochi ind'è l’antulugia di puemi corsi ch'ella ci hà appruntatu. Allocc'à ellu escissi u libru, dui i pudete sente detti da i pueti corsi è po in purtughese detti da Rosa Alice. Ùn si sà propiu da duv'ellu vene l'incantu: da a parentia di e duie lingue rumaniche, da l'arte di a traduttrice o da a voce di a puetessa. Ma saranu tutti è trè à tempu...

    Isse sequenze sò state filmate durante TURCHINU MAIÒ di nuvembre scorsu.

(da vede in e rubriche: Literatura>Puesia è Scontri>Baratti)

DA ZAGREB:

    L'amicu Drazen KATUNARIC (si veca in a rubrica: autori) hè pueta è direttore di a rivista Europski Glasnik chì hà digià publicatu, in u so numeru 9, una piccula antulugia di pueti corsi. Hè dinù direttore di a casa editrice LITTERIS. Ci manda l'ultime paruzione di a so cullezzione "NOVA" è trà quesse ci hè Korzikansko pjesnistvo: od napjeva do pjesme (2012), una scelta di pueti di Corsica tradutti da Vanda Miksic. Fate vi una fidighjata (in a rubrica: Literatura>Isule literarie) ùn fussi chè pè a figura cruata di a puesia corsa...