Ducumentu
Ciutadella. U portu è in fondu a catedrale.
![](https://interromania.com/sites/default/files/styles/image_548xx/public/2_ciutadella_1.jpg?itok=HoFtIZxZ)
Ciutadella hè a cità di i sgiò, a cità vescuvile di Minorca, cù i so carrughji pieni à palazzi,di storia è di nubiltà. I cunquistatori catalani li anu lacatu u so statutu di capitale isulana ch’ella ti avia digià sottu à a duminazione araba. Nantu à a vechja muschea u rè Alfonsu fece fà a chjesa gotica di Santa Maria, finita prima di u 1362 è chì turnò catedrale di u novu viscuvatu di Minorca in u 1795.
Vicinu à a catedrale, a piazza di Born hè u centru munimentale di a cità. Davanti à i casali signurili si trova quellu di L’Ajuntament custruitu nantu à i muri di u palazzu reale. À mezu, l’obeliscu alzatu à u XIXu seculu è chì ricorda l’eroi chì difendinu a cità contr’à l’assalti tremendi di u cursariu turcu Mustafá.
Trà e feste spiccante di Ciutadella ci hè a San Joan, cù i so ghjochi equestri. Hè l’Ordine di Malta ad avè li istituiti in tempi antichi, à sente dì i storichi di u lucale. Intervenenu trè classe medievale: i sgiò ("caixer senyor"), u cleru ("caixer capellà"), u populu ("caixer pagès", "caixer menestral", "caixer casat" è "caixer fadrí"). Tutti i paesi minurchini cù i so cavalli si indieghjanu in a festa cun mostre è cumbatti.
Una ghjurnata di Sant Joan/ grande festa in Ciutadella/ a più bella, a più quenta/di tutte quelle ch’omu face