A VINDETTA

A VINDETTA ùn hè micca solu una pezza di teatru. Hè dinù un prugettu pedagogicu. Issa cullaburazione trà Tuscana è Corsica si scrive in una tradizione di partenariatu oramai cuntinuu, dapoi u principiu di l'anni 1990, à l'epica di i primi prugrama di cuuperazione europea (INTERREG). Si tratta di opere create in cumunu, di testi tradutti da una lingua à l’altra, di cullaburazione trà artisti, scrittori è creatori in ogni generu. Parechje rubriche di InterRomania ne presentanu i frutti
Stu drama quì, A VINDETTA, si insuchja di l’osservazione di Salvatore VIALE in i so Studi critici dei costumi corsi, Firenze, Mariani,s.d., (1859). Marco CINI, prufessore è storicu, ma ancu scrittore è appassiunatu di cultura corsa, ci hà datu un’opera ch’ellu hà messu trà eri è oghje, mettendu u custattu di Viale in cunfrontu cù altre fonte, altre voce, altri passi di storia.
Si sente è si vede cusì a Corsica di sempre, attraversata è scuzzulata da a Storia, insumata di pregiudizii è d’idee false. A pezza hè nera è ci ribomba qualcosa chì sente di fatalità. Issu drama l'avemu rapresentatu parechje volte in u Spaziu Natale Luciani in Corti, in u quatru di un partenariatu cun scole di varii livelli. 

I sculari, cun l’aiutu di i so prufessori, anu pussutu ogni volta leghje è apprufundisce u sensu di issu testu chì prupone, al di là di a quistione stretta di a vindetta, una figura di a Corsica
è di i Corsi chì ci parla di noi. Ogni volta e discussione indiate cun insignanti, sculari è teatrini, vanu à scavà isse quistione chì ùn rimandanu ùicca solu à fatti di storia, ma anu a so leia ancu cun fatti è prublema di a nostra sucetà à i ghjorni d'oghje.

Si sente benissimu in e parolle di prufessori è teatrini ch'è vo truverete in sta filmata, dopu à a pezza ella stessa