Riflessione currezzione - Marielle CLEMENTI

Riflessione

Parte, emigrà, cosa hè ?

‘Ssa questione d’attualità hè passata à u cernigliu da Jeanne Benameur in u so libru « Ceux qui partent ».

À traversu à i testi di Donato, i culori chì Emilia a so figliola ne ricopre e so tele,  l’imaghjine catturate da Andrew, i tissuti di Esther è e parole murmurate in differente lingue, l’autora ricrea u mondu in a so diversità, una diversità culturale chì face a richezza di a ghjente chì hà lacatu a so patria ma chì cuntinueghja di purtà si la in ella stessa. A diaspora cum’è si dice oghje.

Simu in u 1910. « Ceux qui partent » hè a storia di una manata di migranti chì anu fattu a scelta di vene à campà in America, mossi da un sintimentu di sperenza è di libertà. Sò più di cinque milla à aspettà e furmalità, trattati in modu inumanu da un’America chì cumencia digià à arrigulà u so flussu migratoriu. Passeranu a notte nant’à l’isula Ellis Island, vicina di Liberty Island induve hè stata eretta in u 1886, a monumentale statula di a Libertà, un antru simbulu di l’America, à l’imbuccatura di l’Hudson, una notte d’intruspezzione à a scuperta di u so intimu. Frà elli, ci hè Emilia, a taliana, è Esther, una giovanotta venuta d’Armenia è unica sopravvivente di u genocidiu perpetuatu da i turchi ottomani. Ùn hè, ‘ssu detagliu dinù, senza ramintà ci chì a Siria di oghje hè una parte di quella Turchia ottomana di eri.

« A storia di Esther Agakian ùn si pò cuntà ma hè diventata u merollu di e so osse. » A cumprensione hè immediata trà di elle, ancu sè ùn parlanu micca listessa lingua, i so corpi, e so mane si parlanu è si capiscenu. Ognunu campa u so esiliu à modu soiu, in u so capu, in u so core, in u so corpu. Quandu omu parte cù ‘ssa sete di libertà, di sperenza, di rinascita, di scuperte, daretu ci hè l’abbandonu è tutte quelle cose lasciate daretu à sè.

The American Dream, unu di i miti più anziani fundatori americani, sprissione inventata da u rumanzeru Horatio Alger, in u so libru “Ragged dick”, in riferimentu à u passagiu da a miseria à a riescita, inseparevule di l’imaghjina di i Stati Uniti in u mondu. U rumanzeru James Truslow Adams u spiega cum’è u sonniu di un paese duve a vita seria più bona è più ricca è più piena. Eccu, à parè meiu, tuttu ciò chì ‘ssi migranti ricercanu.

Avemu tutti sempre davant’à l’ochji u ritrattu di Aylan, ‘ssa criatura siriana, ritruvatu annigatu nant’à una piaghja turca, sei anni fà. ‘Ssu zitellucciu, di solu trè anni, hè diventatu dapoi u simbulu di a crisa migratoria, eppuru, a storia ùn data micca di oghje, cum’è ne testimunieghja incù pudore è puesia Jeanne Benameur in u so rumanzu « Ceux qui partent ».