A BISCIA DI L’OSTRICONI

Tanti anni sò, eranu assai pupulate l'Agriate, particularamente a pieve di l'Ostriconi! Dui signori si liticavanu per a so duminazione: u Marchese Guglielmu di Massa, dettu « Biancu », signoru di San Culumbanu è quellu di U Spiluncatu, dettu di Belcastellu. Ci era ancu un picculu portu chjamatu A Paraghjola, à mezu à una pianura fertile. Ma cum’ella accade à spessu - chì paradisu nant’è sta tarra ùn si ne cunnosce ! - u locu era statu toccu da una maledizzione strana. Ind'è i stagni di l'Ostriconi, ci stava una bestia, mezu sarpu mezu dragu, chì i paisani chjamavanu a Biscia... Ogni volta, à u sunà di e campane di Santa Maria, iscia a Biscia da A Cannuta, unu di stagni di a foce di l'Ostriconi, per manghjà si tutti i cristiani ch'ella infattava nant'è a strada di e sacre funzione. Un ghjornu chì u sarpu spavintosu ùn suppurtava più chì i paruchjani andessinu à a messa, s'hè strascinatu sin’à u locu santu pè ingolle si una dicina di cristiani chì si truvavanu custì. Tandu, u populu s'hè vultatu versu i signori, dumandendu li di prutege lu, cum’ellu era l'usu à l'epica. Infatti, dananzu à l’ira di a pupulazione, i nobuli ùn stetenu tantu à sceglie. Fù pigliata a dicisione di sbarazzà u rughjone di u mostru carnaghju. Cusì Guglielmu di Massa si lasciò u so castellu di San Culumbanu, à trè leghe da custì. Andò sin'à quellu di u so nimicu Maruvellu di U Spiluncatu, dettu di Belcastellu è li disse :

- Aiò, o signoru di Belcastellu, sarà po ghjunta l'ora di mustrà u nostru curagiu è di tene a nostra parolla !

Ma ùn ebbe nisuna risposta ! Altru versu ùn ci era : à u signoru di San Culumbanu li tuccava à cumbatte solu solu a bestia infirnale... À sente dì, u Marchese Guglielmu di Massa, dettu “Biancu”, si sarebbe sarratu in ghjesgia, sempre à cavallu, è avarebbe sunatu a campana à più pudè...

Tandu a Biscia s’inzerghe, sorte da a so tana è dà pettu à a porta. U marchese ne chjame à u Signore : - O Diu, tù chì supraneghji ogni cosa, arma u mo bracciu è fà mi vince e forze di u male !

 Esce, cù a so sciabbula, face un segnu di croce è tombe u mostru. Tandu, a si piglie d’orgogliu. Mette u mostru sanguinosu è senza capu nant’è a sella di u so cavallu per fà lu vede à tutti. Ma s’hà cacciatu un guantu è una candella di u sangue di u sarpu li casche nant’è a manu è l’avvilineghje. Tandu, casche mortu da u cavallu ind’un locu dettu Mona, longu à fiume Ostriconi. Dopu à a so morte, a ghjente hè à l’addisperu. Una donna impruviseghje un voceru à quell’omu. A nutizia si sparghje in tutte e pieve di u circondu... Pocu tempu dopu, si prisente u signoru di U Spiluncatu davanti à a salma di u mortu. L'avianu spostu nant’è u tavulinu di a cucina di u castellu di San Culumbanu. A so faccia surridente era cum’è una sfida ma in listessu tempu una chjama à a vindetta. Dananzu à u so nimicu, piglie subbitu un antru versu u voceru. A donna chì u cante ùn supporte a prisenza di Maruvellu è li lampe u so vilenu :

- Avà ghjunghje lu signoru, u vigliaccu di Belcastellu Quellu chì hà lasciatu more l’eroie di stu castellu. Quellu ch’ùn sà cà tradisce, impauritu da a Biscia !

U signoru chì ùn si pò lascià ghjastimà cusì in pubblicu s’avvicine d'ella è a tombe d’una stilittata. Tandu nasce ! Partitanti di una banda è di l’altra si lampanu ind’è una baruffa... chì si compie cù a morte di guasi tutti i cumbattanti, lascendu, à sente dì, u locu à l'abbandonu.