U MO ANGHJULU CUSTODIU

Respiru la so prisenza
Sentu lu sfrombu di l'ale
Possu falli cunfidenza
Ghjè guida spirituale
O divina vigilenza
O lu cumpagnu ideale

Subbitu hè statu presente
Da l'iniziu à lu mio latu
Cù lu s'appoghju evidente
Di u male preservatu
Fendumi donna sferente
Ellu si chì m'hà veghjatu

Ùn hè micca statu solu
À portami tant'amore
M'hà offertu in u so volu
Un gran'lume prutettore
Ghjente cara è di cunsolu
Rinforzu di issu mentore

Oghje sempre risparata
Caminu senza paura
Ingiru à mè a vulata
Mi tene in vita matura
Ringraziu quì l'affidata
Di lu custodiu chì cura.

                                                        Cathy Campana, ottobre 2019