Zocculi d’oru longu un raggiu di luna
Cavallu moru luccicheghija la chjoma
Chjoccu di e so ale flussu è riflussu di u mare
Slancciu di a so voce canta è c’incanta o cusì dolce
È fughjenu li mondi

Luna nuda
Luna imbalsamata
Sì la musa
Di sti celi
O Damicella fatata

Zocculi d’oru un manellu di stelle
Cavallu biancu soffiu di cialamelle
Celu ch’inganna spechju trafuratu da e speranze
Da tanti surisi di u ghjornu ferma lu to sguardu
È tandu m’innamoru

Luna nuda
Luna imbalsamata
Sì la musa
Di sti celi
O Damicella fatata

Zocculi d’oru s’hè aperta la notte
Imbulighjati destini framischjati
Chjoccu di e so ale flussu è riflussu di i mari
Mughju di le vite ferite antiche sfilaccicate
È nascenu li mondi

Sole rossu
Sole neru di l’albore
Sole meu
Focu lume
O secretu di u rigiru