Amore « Pizzicato »

Marielle Clementi

In un locucciu d’accordi dolci, e voce di l'amore s’intreccianu,

Cum'è note ballarine nant’ à a purtata di u core  in tamburu.

A suprana, delicata è pura, canta un’incantevule meludia,

E so parolle accarezzanu i timpani d’una dulcezza ch’ùn si stanca mai,

U tenore, appassiunatu è ardente, face risunà u so timbru putente,

Cum'è un criscendu vibrante, sprime u s’amore abbagliante.

U baritonu, grave è affascinosu, culurisce a pulifunia di a so emuzione,

U so cantu empie u spaziu, una cadenza voltacore senza cuncessione.

È a bassa, prufonda è forte, cum'è un ritimu lindu è rassicurante,

Sustene l'armunia, l'unione perfetta, in ‘ssu ballu attraente.

E parolle diventanu musica, ogni frasa hè una partizione,

Una sinfunia di sintimenti, un ode à l'amore senza cundizione.

E note s’intreccianu, s’ammuchjanu, creendu un universu sonoru,

Induve l'amore hè u capu d’orchestru, è ogni anima, una nota chì u tene caru.

E chjave di « sol » è di « fa » si raghjunghjenu, s’uniscenu d’una passione intensa,

Cum'è dui cori chì si tenenu cari, un abbracciu d'amore chì trascende.

È in ‘ssa pulifunia, i silenzi anu a so impurtenza,

Cum'è i rifiati trà e note, intreccianu una cumplicità, una cunnessione.

Allora, chì a musica di l'amore ci traspurtessi in un squisitu ballu,

Una sinfunia eterna, induve e nostre anime s’uniscenu è si spannanu.