U CULTELLU SCURDATU

 

 

U CULTELLU SCURDATU

adattazione corsa di “IL COLTELLO SCORDATO”

di
Vincenzo ADRAGNA
“La Messa del prete morto”. Leggende, fantasie ericine e mimi
Palermo, Publisicula, 1980

U muntagnolu era esciutu di casa a matina à l’alba, chí devia andà à zappà luntanu e vigne pè a stonda di marzu è ci era un fretu chí l’acelli falavanu secchi, ma ùn ci era nunda da fà: camminà è zappone in spalla. Avia chjappu a sacchetta ch’ella li avia appruntatu a moglie pè a merenda è cammina è cammina chì era à mumenti ghjornu fattu quand’ellu fu ghjuntu sopra à locu.
Tandu arripone a sacchetta sottu à l'alberu chì ellu solu sà qualessu hè, è cumencia à zappà è zappà per a stonda in isse vigne, ch’osinnò mai più facenu uva di quella bona.
È zappa per tante ore chì, da tantu fretu chì c'era, si ritruvava quasi sudatu, è po vene l'ora chì ci vole à manghjà chì a fame l’hà: zappà hà zappatu, è un buccone li tocca.
Tandu u muntagnolu và à piglià a sacchetta sottu à l’alberu chì ellu solu sà. È, pigliata la, ne caccia a bastella cun l’alive è a buttigliuccia di vinu acitosu ch’ellu li offre u patrone. Tiratu fora a robba, fruga dinù in a sacchetta, ma più nunda ùn ci trova.
- È u cultellu, duve hè? Sanguediamadonna ùn possu manghjà nunda chì u cultellu ùn ci hè!
Nunda à fà. Manghja duie alive; beie una goccia d’issu vinu acitosu ch’ellu li offre u patrone; dopu rimette tuttu dentru à a sacchetta è torna à zappà butulendu. È zappa cumu un poverucristu per tutta a santa ghjurnata chì ferma, quelle vigne, pè issu acconciu maladettu di marzu chì mancu si pò manghjà un pocu di pane.

Compia a ghjurnata, cammina è cammina versu a casa; zappone è sacchetta in spalla.
Ghjuntu ch’ellu hè, trimulendu è tracurrendu di stanchezza è di fame:
- Chì avete, u mo maritu – li face a moglie – chì vi vecu ghjunghje cusì fiaccu?
È prima chì a moglie pudessi risponde una parolla, annervatu: 
- Cumu facia à manghjà pane – face ellu, mustrendu li a bastella micca tocca - chì, imbambulita ch’è vo site, ùn mi avete mancu messu, in a sacchetta, u cultellu chì ci vulia?