THE VILLAGE ATTITUDE DI PETRU MARI

Ciò ch'è no simu, ciò ch'è no simu diventati... A cunniscite the village attitude?

Site in Ajacciu o in Bastia, aspettate qualchì minutellu, micca di più, è prestu viderete nant' u corsu o a traversa, un omu chì cansa u Toiottà, incù e so rotuloni di camiò. Quand'ellu apre a porta per varcassi, prima affaccanu i so scarpi di muntagna, issi scarpi tamanti per viaghjà in i filettaghji. Dopu venenu l'anche è tuttu u restu. L'omu hè vestutu d'un treillis bracanatu di biancu è di neru, ma micca nettu nettu. Si vede ch'ellu hà digià qualchì ghjornu di vita è vi figurate chì u vestitu hà u muscu di u rosumarinu. È infine esce a faccia. Micca rasatu.

A barba nera hè di trè ghjorni. Cum'è i so capelli, ch'ùn facenu un centimetru di longu.

Ùn ride micca. Ùn hà mai risu.Ùn sò chè e feminette chì ridenu. Il a « the village attitude ».

Sbatte a porta di u Toiottà incù « le geste auguste du semeur ». Clicca nantu à a chjave elettronica.

I cennulenti di u pick-up cennuleghjanu trè volti. Ma ellu, indifferente à l'estri di a so mascina, hà vultatu u spinu è s'alluntana d'un passu studiatu per esse longu è pisante. È incù issa infurcatoghja, fatta per andà pianu è luntanu, và à l'uffiziu asceleme o à l'uffiziu idrolicu, duv'ellu hà un scagnu d'impiegatu, ringraziendu u cunsigliere generale.

Ghjuntu in i lochi, trova i so cumpagni di travagliu, cuncultati intornu à a mascina à caffè.

Anu tutti un Toiottà incù rotule di camiò, scarpi di muntagnolu, treillis bracanati. È ūn sò micca pédés. Puru s’elli si basgianu.

Anu tutti the village attitude. U basgiu, u basgiu virile, trà omi pilosi chì u sabbatu cantanu à u contuaru di l'unicu caffè di u cantone, ghjè a so espressione a più attuale.

È à certi l'annerba issu basgiu virile trà omi pilosi chì u sabbatu cantanu à u contuaru di l'unicu caffè di u cantone. È anu creatu u FAB, issi azezi, u Fronte Anti Basgi. Dui suttanacci, ch'un vogliu micca cità i nomi. Ūn anu micca, the village attitude. Hè certa.