ATTELLU DI SCRITTURA

L’amicizia di un giuvanottu è d’un pescial finu

 

A storia stalvò in Italia. Marco fù un omu tramannatu.

Sinamente à i so vintidui anni, Marco Sisto fù un masciu cupu, sulitariu per via di a so debulezza. Ùn parlò quasi mai. Tandu l’altri ùn lu vidianu nè sintianu ed hè per quessa ch’ellu si cunfinò in sè stessu. Ma un ghjornu un spetaculu splendidu sbuccò in issu locu: un stolu di pescialfini apparse è stetinu una bella stonda. Eranu una vintina... Si spustonu da l’Oceanu atlanticu versu l’Oceanu pacificu. Subitu chì Marco l’ebbi visti, i parenti ebbinu a certezza chì u giuvanottu era cambiatu. Di fatti si pudia vede nant’à a u so visu un picculu versu cumu d’allegria. I so prugressi funu evidenti è tutta a so famiglia si ne rallegrava... Ma i delfini si ne andetenu...

Dapoi a partenza di i delfini, a ghjente presente à latu à Marco s’impenserinu. Temianu tutti chì u ghjuvanottu ricaschessi in l’adisperu. Ma dopu à una stonda un delfinu s’avvicinò à a ripa di mare è messe à fà salti tamanti à mezu à l’acqua. Marco l’incuragia, ridia propiu di core è u ringraziò cappiendu scaccani cumu mai ne avia fattu sente... A ghjente capinu ch’ellu era natu trà u zitellone è u delfinu un puntu di cumunicazione cumu nimu u pudia spiicà. È tandu spuntò trà tremindui un’affezzione fora di u cumunu è piena di misteru.

U pescialfinu fù presente l’estatina sana, ma quand’ella si fece sente l’affaccata di l’inguernu, u timore si pigliò à tutti à l’idea chì u delfinu si ne avia da andà... Ghjunse issu mumentu, ma ciò ch’impressiunò à tutti fù u cumpurtamentu di Marco. Di fatti penseru è tristizia ùn li ne vense mancu à pena, sicuru ch’ellu era chì u pescialfinu devia vultà, devia... Hè cusì si passò l’affare un annu dopu à l’altru durante sei anni... L’amicu soiu vultò subitu ch’ellu spuntava ogni veranu. Si capì ch’ellu era grazie à issu delfinu chì d’un masciu affannatu, tristu è sulitariu ne avia fattu un ghjuvanottu alegru è cambiatu tantu chì mai mai si saria pussutu pensà. In fatti, messe à campà cun tutti l’altri ghjovani, amparò à leghje è à scrive è –ma quale l’avaria pussuta crede?- à cmunicà incù l’altra ghjente di a so famiglia.

L’amicizia di Marco cù u so pescialfinu fù una vera terapia chì li permesse di mischjà si cun l’altri, di truvà un appoghju è cunfortu è di smenticà i so affanni.

Ma una matina, u delfinu ùn fù presente duv’elli si truvavanu di regula tutti i ghjorni. Issa mancanza sparse u penseru in a pupulazione sana di u paese. Tandu, impazziti tutti quanti si ne andetenu à ricircà duv’ellu pudia esse l’animale... È cerca da quindi è cerca da culandi, delfinu ùn ne truvonu mancu a vistica...

 

Ci era solu un battellu chì pigliava à l’altu mare... A ghjente anu capitu ch’ellu ùn si videria più l’amicu di Marco è chì issu battellu ci era per qualcosa.

In quantu à Marco, ùn stete tantu è vultò subitu à u so statu di prima...

È pochi ghjorni dopu, ancu Marco era sparitu...