A seconda stonda di u spostu hè cunsacrata à l’elementi primi di u pensà in quantu à u lume, e teurie ch’ella inghjenna issa energia è e cunsequenze in quantu à u modu di pensà u coppiu lume/energia è a pussibilità di imaginà un calculu di ciò chì si passa in a materia. U fotone, particula elementare di l’energia luminosa, hà di sicuru un postu predilettu in isse speculazione, ma ancu a custruzzione teorica chjamata tempu di Planck. Quessu hè u tempu ch’ellu ci vuleria à un fotone da fà, in u viotu, una distanza misurata lungura di Planck. A misura più minima di u tempu atta à piglià si un significatu fisicu in e teurie d’oghje, tenutu à mente dui stremi : 1) A lungura di Planck hè a lungura più minima chì si possa misurà 2) A vitezza di u lume hè a vitezza più maiò ch’omu possa cunnosce. Cunsequenza : U tempu di Planck hè quellu chì currisponde cù a misura più minima di u tempu ch’omu possi fà.