Mistiriosa citadedda, bianca com’è la calcina
Se l’ultima sintinedda, di pettu à la marina.

Di pettu à la marina è lu mari prufondu
Quandu l’acqua s’avvicina, a l’entra di lu to mondu

A l’entra di u to mondu, da u tempu custuditu
Chì tuttu in lu circondu, pari pà sempri sculpitu.

Pari pà sempri sculpitu da issu ventu chì ti tocca
È chì mai ùn hè sparitu, da l’entra di la to bocca

Da l’entra di la to bocca, purtonu di l’immensità
Sculpitu in quissa rocca, teatru di l’antichità

Teatru di l’antichità, pà tutti l’espluradori
Chì vuliani cunquistà u to elpali di valori.

U to elpali di valori, divintatu casteddu
Chì tutti li signori, t’ani missu l’aneddu

T’ani missu l’aneddu, pà fà di tè una righjina
D’issu mondu cussì beddu, chì strapiomba la marina

Chi strapiomba la marina, sin’à Punta Partusatu
Fighjulend’ogni matina, l’urizonti à lu so latu

L’urizonti à lu so latu, cù lu so riflessu giaddu
Chì mai ùn s’hè scurdatu di Lavezzi é di Cavaddu

Di Lavezzi è di Cavaddu, perruli di issa cullana
Sò li maistosi scoddi di pettu à la sulana