NATALI DI U 14

Sentu cantà li pina
Viulinà lu fiumu
Un'aria casandrina
Mi stringhji d'un colpu
Un frusciu di stoccu
Mi stò induva stocu
Ma sempri ti rivig'o mà
Sò tantu solu avà, ma sò quì o mà

Sentu calà l'areghju
Di la prima matina
A tarra hè mareghju
U cori smizatu
Di tristezza hè sbrumatu
Mi stò induva stocu
Ma sempri ti rivig'o mà
Sò tantu solu avà, ma sò quì o mà

Un c'hè celi furdanu
Un c'hè furdanu lumu
Ma mi stocu luntanu
Da a me casuchja cara
Stesu nant'à sta tarra
U me ansciu hè fiumara
Ma sempri ti rivig'o mà
Sò tantu solu avà, ma sò quì o mà

(Adattatu da Dreaming of home di Lori Barth et Gary Lewis)

À I PORTI DI L'ESSA

O Ghjuvà, rammenta ti st’impreca
A i porti di u disertu.
A pianura hè immensa è u ventu acceca
I suldata ingordi di u scontru incertu.
Chì hè u più fundivu trà illusioni è biotu ?
A circa impussibuli o l’ideali infermu ?
U distinu supranu, u sognu patriottu,
Sò stantarati quì, forsa par sempiternu.
L’hai vulsutu fughja st’universu di piani,
Quidd’abitudinacci è a vana misura.
E po l’hai abracciata a furtezza Bastiani
Spirendu un mondu novu in a vittoria sicura.
U ventu hà sbulicatu di Cronu u rinaghjolu.
O gloria sunniata ! O furtezza strigata !
D’ùn avè fattu casa mi trovu senza stolu.
Chì scherzu di a vita ! Di l’urgogliu a infangata.
Tartari maladetti m’eti arrubatu a vita.
O forsa hè vanità, murtoriu di l’attesa.
Aspittendu st’incontru sò mortu à fitta à fitta
E d’ùn goda lu ghjornu mi sò scurdatu d’essa.

( Ispiratu da Il deserto dei Tartari di Dino Buzzati)

MORU

Eccu pur ghjunta l'ora di a cunfina,
Hè a fin di u viaghju è a me vela hè stanca.
Ghjeu u porta bandera di a bellissima latina,
Desdemona è Venezia ebbi par carta bianca.
Un mandiluchju di seta ricamatu d’incantu
Da una sibila vechja chì di Bast amparò,
Saldò a me furtuna purtendu quì u cantu
Di i me fatti guerrieri u so cori ingumbò.
Socu u Moru scadutu, u vechju arghjetu negru.
A prò di u Lionu dissini u me valori.
Socu u stessu è un antru, di quissa ùn mi ralegru,
Chì vinta a turca rabbia, vissini u me culori.
O ghjilusia infama ! O spavintosu umori !
Un voddu fà vinici à sta peddi d'alabastru.
O rosula canina rispiru u to adori,
Un «Tù» chì fù a me vita, u me focu, u me astru.
Socu u Moru scadutu, u vechju arghjetu negru.
A prò di u Lionu dissini u me valori.
Socu u stessu è un antru, di quissa ùn mi ralegru
Chì vinta a curcia rabbia, vissini u me dulori.
Sò Moru, sò moru, s’è mori mi morgu
Sò moru, sò Moru, s’è mori mi morgu
s’è mori mi morgu di tè.

(Ispiratu da Othello di William Shakespeare)