SAN ROCCU

 

 

San Roccu nascì in Mompellieri una ottantina d'anni dopu à a creazione di a famosa facultà di medicina. À l'età di 20 anni, orfanu di babbu è di mamma, partì in Roma cum'è pellegrinu, dopu à avè spartutu in dui a so furtuna : a prima parte, a dete à i poveri, a seconda, a dete à un ziu per ch'ellu a fessi fruttificà.

 

Nant’à a strada di Roma, Roccu fece l’arrette in ogni locu duv'ella ci era una epidemia, curò i malati, è ancu i guarì fendu u segnu di a croce.

 

In Roma, ci stete parechj’anni. Quand'ellu ripartì, avia chjappu a pesta. Ghjunse in Mompellieri, guvernata da u ziu, quandu, in cità, ci era a guerra civile. Si rifugiò tandu in una furesta per francà a ghjente d’issa malatia appigliaticcia. Custì, serebbe mortu di fame s’è, tutti i ghjorni, un cane ùn li avia purtatu un pane.

 

Passò per un ribellu, è l'arrestonu. Era tantu malandatu chì, nè u ziu, nè nisun altru u ricunniscinu. È ellu ùn si fece cunnosce. U messenu in prigiò duv'ellu morse cinque anni dopu, versu l'annu 1327.

 

Dissenu chì a caccara ricunnuscì u cadaveru per via chì, nantu à u pettu, Roccu avia una brama di vinu in forma di croce.

 

 

 

 

 

 

 

 

 

 

 

Preghera à San Roccu

 

San Roccu, l'amore di Diu  chì inundava u vostru core

Vi hà fattu lascià tuttu per una vita nova.

Partutu in pellegrinu pè a Cità Eterna,

À u soffiu di u Spiritu, andavate pienu d’ardore.

 

Amicu di u Diu Vivu, San Roccu, chjarite ci !

 

San Roccu, in u vostru amore per i più miseri,

Avete imitatu u Cristu chjinatu annantu à l'angoscia,

Offrendu a libertà à quelli chì sò oppressi

È a bona nutizia à tutti i disgraziati.

 

Amicu di i più poveri, San Roccu, agguardate ci !

 

San Roccu, in cinque anni à mezu à e persone ammacate,

Avete allegeritu tanti dulori umani :

E ferite sò diventate sane, sott’à i vostri diti ispirati

È i pestiferi funu guariti.

 

Amicu di i malati, San Roccu, aiutate ci !

 

San Roccu, per anni, in ferventi pellegrini,

Venimu à pregà vi in ‘ssu paisolu d’Olmi.

A nostra fiducia in voi si vede annantu à i nostri visi:

Site u nostru guidu chì illumina i nostri chjassi.

 

Amicu di i pellegrini, San Roccu, prutegite ci !

 

San Roccu pregate per noi,

Alluntanate di a nostra vita è di a nostra famiglia

A gattivezza è e malatie di u corpu è di l'anima.

 

San Roccu, voi chì a vostra memoria hè stata tenuta in ‘ssa cappella canarese per tant’anni,  intercidite per i malati è e so famiglie !

 

Ricurdate ci a grandezza di u nostru battesimu !

 

 

È cusì sia !

 

 

 

 

Marielle Clementi

Canari u 16 d’aostu di u 2023 – Paisolu d’Olmi – Cappella San Roccu