Bonghjornu ! Sò una gatta, è vi vogliu cuntà quì a mo vitaccia cù i mo maestri, infine i mo sughjetti , à dì la franca !

Sò ghjunta ind’è elli quandu era sempre una misgetta, di ghjunghju di u 2011. Pensate, avia trè mesi ! A mo mamma era smarrita è cù i mo fratelli è surelle simu stati purtati in un rifugiu di e Ville. Sò stata scelta perchè chì era a più ghjucarina è ficcanasa di tutta a purtata. 

I mo maestri m'anu datu un nome, chì hè "Princess Peach", infine u so figliolu minò. Ancu s’ellu era quellu chì mi vulia u più, ùn lu possu pate à quessu è mi piace à azzuffà lu. Ogni volta ch’ellu passa vicinu à mè, mi lampu nant’à i so zancari tutte sgrinfie fora. Princess Peach, si pò dì ch’ellu hè un nome assai speziale per i misgi, ma mi piace assai, chì sò veramente una principessa. Micca cum’è ‘ssa spezia di puppatula bionda è appena baulla chì regna nant’à i funghi, in u so ghjocu « Super Mario », neh !

À u principiu era assai apprensiva. Passava a maiò parte di u mo tempu à dorme sottu à u canapè (quessu l’aghju arruvinatu, è po !) o nant’à un cuscinu. Ma i mo maestri sò stai assai pazientosi cun mè è anu pigliatu u tempu d’aiutà mi à fà mi à a mo nuvella casa. À pocu à pocu, aghju cuminciatu à esplurà. Aghju scupertu lochi cunfurtevuli per dorme, lochi per piattà mi è ghjoculi per ghjucà. Aghju amparatu ancu cumu utilizà u lettaghju, chì i mo maestri ne funu felici. Ci vola à dì chè s’è trovu unu di i so fiori, mi n’occupu eiu, neh ! Ùn hè naturale u suvu pè e piante ? Quandu aghju fattu una scimità, mi sò truvatu un locu sicuru sottu à u canapè : aghju strappatu tuttu u sottu è mi ficcu nentru è ponu puru chjamà mi chì ùn rispondu, neh !

Cù u tempu, aghju sviluppatu una relazione assai forte cù i mo sughjetti. Sò diventata assai attaccata à elli, è mi piace à passà tempu cun elli. À pensà la bè, sò piuttostu elli chì si sò attaccati à mè ! Sò assai bravi quantunque, ci hè peghju ! Sò spessu pusata nantu à e so gambe quand'elli guardanu a TV o leghjenu un libru. Mi piace ancu à inficcà mi à pusà nantu à u so lettu di notte per fighjulà mentre chì dormenu. Infine, ùn la sanu micca chì ùn mi volenu in camera, ma eiu, maligna, apru a porta cù e mo sgrinfie è girgu quant’è sette in a casa, ma zitti, ùn ci vole micca à dì la ! Dapoi chì aghju pruvatu di parte cù un pullastru, ùn lascenu più nunda in cucina, ‘ssi topi !

A pitanza hè bona quì, è aghju acqua fresca ogni ghjornu. Di tantu in tantu mi danu ancu dolci, chì mi rendenu sempre felice. U più chì mi piace hè a butarga, nunda ch’à annasà la, sò cum’è scimatulita. Elli credenu chì ùn li capiscu micca, cusì facciu l’attu d’ùn sente nunda, ma pè fà li piacè, quandu sentu a parolla « manghjà ? » m’arrizzu cum’è un fusu !

Sò una gatta assai felice è accunsentu chì i mo maestri campessinu in casa meia. Mi piace à passà i mo ghjorni à dorme è à manghjà. Ùn aghju tempu di nunda quì ! Sò una principessa o micca ? 

Ma à pensa la bè, più bella vita, ùn ci hè ! Infine à sente li dì…