Cume aghju fiascatu a mo cena di Natale...

 

Per via di u Covid, st'annu celebreremu Natale tramindui. Prepararaghju una festa degna di tè, u mo Principe.

 

Sò turnata di Centuri cù duie belle arigoste. Mentre a mo Mini ingola e girate è l'asfaltu di ‘ssa strada tipica sinuosa di u Capicorsu, assavu in avanzzu u nostru incontru di sta sera.

 

Aghju tantu imaginatu stu pranzu chì ne cunnoscu ogni passu per core. Sentu e « damicelle » chì chjachjareghjenu in u saccu di tela. S'elle sapianu, e tinte,  chì in unipochi d'ore vanu à bullera !

 

Sò 4 ore di sera, principiu i preparativi. Pigliu l'arigoste pè e so antenne è e mettu in u bollu d’acqua salita per 10 minuti. Aghju messu u fenu in u fumoghju. Tagliu l'arigoste in medaglioni è e mettu à ruste appena nantu à u focu.

 

Sicondu a nostra tradizione di Natale, aghju messu duie legne di querciu in u focu perchè chì seremu dui à tavula.

 

Cù l'acqua di cucera, a gelatina è u sciampagnu, preparau una espuma. Filtru, sifonu, inseru a capsula di gasu per impedisce a gelatina di caghjà è mettu à u frescu.

 

Un toccu di butiru salitu nantu à i medaglioni rustiti per impedisce li di siccà si è i mettu in l'affumicatore per mantene li à u callu.

 

Passu avà à l'accumpagnamentu ch'e aghju da fà coce à u focu quandu piglieremu l'apperitivu. Aghju compru murelli. L’asciugu cù un turcione è cacciu u pede. Sbuchju un agliu per ogni fungu chì tagliu in quattru pezzi è chì inficcu in i funghi. In u tufone lasciatu da u pede, mettu un pocu d’oliu d'aliva, sale, pevaru è riservu à u frescu.

 

Sò 6 ore è mezu, quandu sortu di a sala di bagnu. Aghju tiratu i mo capelli biondi in un torchjulu da induve si scappanu unipochi di ciuffi. Mi mettu pendini in diamanti à l'arechje è per l'occasione, mettu ‘ssu vestitu di seta nera, Yves Saint Laurent, à riflessi d'argentu, chì ti piace tantu. I scarpini argentati Jimmy Choo cumplettanu a mo tenuta.

 

Hè ora di preparà l'apperitivu. In u shaker, mettu duie dose di licore di castagna, una dosa d’acquavita, 1 cuchjare di zuccheru di castagna è un biancu d'ovu.

 

Settore è mezu, sì quì. Hè ciò chì mi piace cun tè, a to puntualità.

 

Mentre apri a buttiglia di Cristal Roederer, mettu i funghi nantu à a grilla è i mettu nantu à a rusta.

 

In i dui belli bichjeri, servi u sciampagnu culore d'oru. Scuzzulu u shaker forte è riempiu e coppe cù a mistura. Una pizzicata di zenzeru frescu nantu à a sciuma furmata da u biancu d'ovu è a mo suppa di sciampagnu hè pronta.

 

Mettu dui medaglioni di arigosta per piattu è un fungu, un pocu di spuma à u latu, unipochi di granuli di caviale è una fronda di petrusellu decoranu i belli piatti di porcellana bianca à bordu d'oru.

 

L'arigosta hà u gustu delicatu di focu è di fenu. U focu è l'agliu sublimanu ancu a delicatezza di u murellu.

 

Alzi u to bicchjeru di sciampagnu è rendi umagiu à a mo cucina.

 

Bon Natale ancu à tè, u mo Principe.

 

Mi alzu per andà à piglià u biscottu tradiziunale, mentre chì tù riempii i nostri bichjeri di sciampagnu. Aghju digià purtatu u piattu di i tredeci dolci è tornu cù a torta quandu d’un colpu, Castagnu, u canucciu è Birbu, u gattone, cumincianu à litigà si per a piazza nantu à u canapè, si correnu appressu, mi sfilanu trà e gambe, facendu mi cipicà nantu à i mo tacchi alti. Squilibrata, cappiu u piattu cù u biscottu chì casca à mezu à u presepiu. Ci hè cicculata pienu u tappettu, nantu à e sedie è a to bella camisgia bianca. Sò cascata à ghjinochji cù u capu nantu à u canapè, mentre i dui ambraschi cuntinueghjanu à abbaghjà è miaulà da l'altra parte di l'appartamentu.

 

Quandu mi guardi, ti scappe una risa cumunicativa malgradu u ridiculu di a situazione. I pastori di ghjessu sò sutterrati in un matalzu di torta, è a mo faccia è i mo capelli sò pieni di cicculata. Malgradu a to ilarità, veni quantunque à aiutà mi.

 

Ebbè, quest’annu, a veghja di Natale, serà senza u so biscottu !