Di notti bughj’è nera, Francescu Maria si n’andava in Cavru incù u so sameri Fasgianu, i bertuli pieni di casgi, pà essa in piazza di marcatu à punta di mani, s’eddu vulia truvà un bancu bè piazzatu pà venda i so casgi.
U celi era carcu di nivuli chì piattavanu pà mumenti a luna, si u ventu suffiaia à quandu à livantu, à quandu à u meziornu.
U ponti di Curraghjola era sempri luntanu, è bisogn’à francà u fiumiceddu pedi in acqua.
Ma u sameri avia a seti. Si mett’à bia à lingua da fora, quandu a luna sparisci di colpu daret’à un nivulu, è ùn si vidia più mancu à un metru!
-« Eccu issu samiracciu chì s’hè bitu a luna! O Fasgià! T’aghju d’accapà eiu! Rendi subitu a luna chì semu in u bughju ». 
Ma a luna hè sempri piatta!Francescu Maria intoppa u turcineddu chì tinia strinta a funi di l’imbastiu, è techja di colpi u povaru sameri. Ma lintata a funi, i bertuli pieni di casgiu chì pindiani d’ogni latu; cascani in fiumu!
 
Ma in un mumentu , u ventu capula u nivulu, è a luna splendi dinὸ!. 
-« A’ capitu o samirὸ! I casgi anu leccu! Ma ancu di grazia ch’e t’aghju minatu, è cusì m’hà resu a luna!Ch’edda sia l’ultima volta mì!“.
Tandu u nivulu piatta torna a luna! 
-« Ma sarà po pussibuli!Voli ch’e mi tronchi u coddu in piena bughjura? 
Tè , è po tè, piglia ti dinὸ issi bastunati, cusì capisciarè qual’hè u patronu!»
 
Un colpu di turcineddu in capu mal calculatu, è u povaru sameri casca in terra, mortu, chì si pὸ dì mortu! Ghjustu quandu a luna si faci veda torna, più lucenti che mai, è si pὸ veda u vangonu fin’à Ecicca Suaredda!
-« Han han! A’ capitu avà! L’hà puri resa, a luna! S’e ùn t’aviu tombu, ti sarii tinutu a luna, è u mondu interu era cundannatu à campà in u bughju!
 
Fieru di avè salvatu l’umanità, Francescu Maria hà cacciatu l’imbastiu carcu, u s’hè missu nant’à i spaddi, è sin’hè andatu pidiὸ pidiὸ, allegru è cuntenti in Cavru à venda i so casgi, trosci è bè, ma s’è ùn sὸ secchi siccaranu!
 
-« Ancu di grazia ch’edd’ùn runcaia « hi han hi han » in viaghju », diciariani quiddi chì anu cattivu stintu è chì miritariani i colpi.!!