SPASSIGHJATE TRÀ ARTE È VITA - 15 di maghju

#VasculitisDay

Oghje u 15 di maghju pò parè un ghjornu ordinariu pè voi, ma per mè hè un ghjornu simbolicu.

U 15 di maghju hè a ghjurnata mundiale di a vascularita.

Vascula... Chè?? 

Ma, chì ghjè ?

Una vascularita hè una scissa infiammatoria di i vascelli, essenzialmente di l’arterie, per via d’una attività anarchica di u sistemu immunitariu.

 

-- Vi spiegu : u nostru sistemu immunitariu ci ghjove à difende ci di l’elementi esteriori (sischi, batterie, tussine…) chì ponu entre in u nostru urganisimu,  ma accade ch’ellu scumbatissi i so propii urgani e rete sanguigne.

In u casu di e vascularite, pò addestrà una stringhjitura di u diametru di i vascelli è altre cose cusì simpatiche… A mea hè a vascularita detta di Behçet. Sò trattata di sicuru, ma stu tipu di patologia detta "auto-immuna" o "auto-infiammatoria", ùn si guarisce micca.

A malatia di Behçet hè una infiammazione cronica di i vascelli sanguigni (vascularita) chì cagiuna dulore in bocca è ferite genitale, lesione di a pelle è prublemi oculari. L'articulazione, u sistemu nervosu è u cannellu digestivu ponu ancu esse infiammati.

Hè una malatia cronica chì evolueghja in sframbulate.

In u mo casu, aghju principiatu prima pè bucciule gigante in a bocca è a gola, è po’ numerose scisse oculare, oghje, cume s’è ùn’avia micca abbastanza, aghju sviluppatu un’« artro-behçet », mi mughe da per tuttu è soffiu cum’è un boie… ma, ùn v’inchietate, zitelli, tuttu và bè !

Perchè chì  vi spiegu tuttu què!? Perchè chì campu cun issa vascularita sistemica dapoi più di sett’anni ? Nò,ùn aghju bisognu d’essa lagnata, hè pè sensibilizà a ghjente nant’à isse malatie ch’ùn si vedenu micca ma chì esistenu è facenu soffre tantu mondu. Ùn ghjudicate mai, s’è vo ùn sapete ciò chè no passemu senza ch’ella si videssi…

U trattamentu di una vascularita sistemica dipende di sicuru da u diagnosticu finale è serve solu à evità l’evoluzione è a peghjurera, ciò chì hè digià bè.

 In ogni casu, hè generalemente basatu nantu à  l'usu di curticoidi, soprattuttu à u principiu di u trattamentu. Hè ‘ssa classa di molecule chì permetterà un prestu cuntrollu di a malatia, ma à u costu di l'usu à dose maiò è dunque un risicu significativu di cumplicazione (ipertensione, diabetu, obesità, è cetera). Quandu a malatia diagnosticata hè severa, cunnisciuta per recidiva o evoluzione per un longu tempu, ciò chì cuncerna a maiò parte di i malati, hè suggeritu d’assucià ci un trattamentu immunosuppressivu cunvenziunale (azatioprina, metotrexate, micofenolato, è cetera) o bioterapia (rituximab, tocilizumab... ). Certi nomi, induve i truveranu ?
Dunque, oghje vogliu solu celebrà , s’ella si pò dì cusì, stu ghjornu perchè chì sò una d’isse milione di persone chì campanu cù ‘sse malatie invisibile
 
Un ringraziu tamantu à i mo duttori, à tutte e persone chì mi sustenenu in sta lotta d’ogni ghjornu, è à l'associu « France Vascularites ».

Pè ride ne appena, vi vogliu dì chì aghju l'immensu privilegiu d’esse stata arregistrata à a banca naziunale di e malatie rare ! È ùn hè datu à tutti, neh! (Una malatia rara affetta menu d’una persona nantu à 2000) Quessa sì a furtuna !

 

 

S’è vo’ vulete dimustrà u vostru sustegnu à e persone chì campanu o chì sò affettate da vascularita, mettite un ritrattu cù u "V" di u #VasculitisDay, cume l’aghju fatta eiu, nant’à e vostre rete suciale.