Allora, vi aghju da cuntà una fola ch’ella mi hà cuntatu a mo caccara. Si chjama a fola di u Surbellu... 

Dunque s’è vo cullate versu u paese di A Croce, truverete un paisolu chjamatu U Surbellu...
Nanzu era un paese pienu di vita. A ghjente campava felice. Cultivavanu a robba per manghjà, cum’è u granu, e castagne, l’alivi. Allevavanu porchi, capre è pecure, pè a carne... Facianu i so casgi, i so brocci ch’elli vendianu... è i zitelli andavanu à a scola in paese... Ci era sempre un aiutu trà i vicini. Avianu tutti ca casa in corpu! 
Ma cù u tempu, u paisolu si hè viutatu... I zitelli anu riesciutu è anu duvutu falà in piaghja per andà a a scola... i vechji si ne sò andati ver di l’aldilà è à pocu à pocu, e culture sò state tralasciate è U Surbellu s’hè spintu. Per via di u travagliu in piaghja, pè esempiu, era cumplicatu per ricullà è fà rinvivisce u paisolu è certi, u tempu passendu, si ne sò discurdati d’issu locu...
Oghje chì ghjè oghje, u paese hè diventatu una ruina. Certi tetti di e case si ne sò falati, a natura hà ripigliatu i so dritti è ne ferma d’issu locu solu qualchì alivu per mostrà... chì e cose ùn sò micca sempre micca state cusì. Nimu si ne vole avvicinà, mancu per fà una spassighjata in i carrughji perchè dicenu chì si sentenu osservati è certi dicenu ancu chì s’è vo passate a sera, parenu ch’elli ci sò lumi accesi in e case è a ghjente dicenu chì sò l’anime di l’anziani chì campanu sempre quì.