A tela fatata

Cù u tilaghju di mammona
piattatu sottu à a pula
ogni notte m’appartu
è tessu fili di luna.
Una notte v’aghju dipintu
u volu di u ventu.
Fole ne legu centu
tutte cun nodi di sole
postu chì u filu hè finitu.
Cù l’ala bianca di a matina
è antichi canti d’amore
aghju imbastitu l’orlu.
Pongu bottuli di gigli
è mi sò messa à arrubà
in a bisaccia di u tempu
ale di sogni pinti.
Ricami di vazza,
aghju arrubatu l’amore
è l’aghju messu drentu,
perchè ùn vogliu
un vestitu pè a festa
ma vogliu un vestitu fatatu
chì mi faccia sunnià ogni ghjornu.
Cusì ogni notte m’appartu
è tessu fili di luna.
Ma hè per pensà à tè.