Versione :

DA CORSICA: Cor di pantera

Cor di pantera

(Paroles et Musique : traditionnel)

Audio
chant: R. Chiorboli;
accompagnement: F. Andreani

Principià vogliu
Di u m'amore la guerra
Cun tantu orgogliu
Mi t'ai lasciatu o cara
Or di tuttu què mi spogliu
Bench'ella mi sia amara
Ùn mi pare d'esse degnu
Mancu più di vive in terra.

M'avie prumessu
Di tè m'era ingagiatu
Davant'à Diu
Ghjuramentu prestatu
Prufittatu ai di mene
Quandu eru à lu sullatu
M'avia fundatu un palazzu
È l'aghju trovu spiantatu.

Tuttu spiantatu
È senza fundamenti
L'altri attendenti
S'eranu messi nentru
Eiu ne girava à l'intornu
Cun orgogliu è gran turmentu
Sì stata cum'è Bazaine
Quand'ellu ordì tradimentu.

Cor di pantera
Tù ne serai in eternu
Chì à lu mio core
Ficcatu ci ai un pernu
Eu sò cum'è li banditi
Chì stanu fora l'inguernu,
Sò cum'è li gran'suffrenti
Chì vanu à brusgià à l'infernu.

Quì chjodu u fogliu
Cun tristezza infinita
Tutta speranza
In u mio core hè sparita
Quella chì n'hè la cagione
Di nunda sia esaudita
Sianu lacrime è sangue
U restu di la to vita.