Michel TANNER face un bellu pezzu ch’è no u scuntremu durante l’appuntamenti di L’IITM. Issu omu hè un prufessiunale di a scena. Hà l’arte è a passione di u teatru : si vede è si sente !
Hè venutu di nuvembre in Corti per TURCHINU MAIÒ. U seguitemu quì cun primura longu à issa oretta chì ci intratene cù e so rializazione, u so prugettu, a manera ch’ellu porghje u so insignamentu è ch’ellu mischja spressione è ripertorii. Si sente un omu di teatru animatu da un fervore creatore è una vuluntà di cumunicà è di fà. A so cultura classica hè tamanta è à sente lu dì ma quale puderia pensà chì u teatru chì ne parla cun tantu calore hè un ripertoriu creatu millenii è seculi fà ?
Presenta a Fabrica di Teatru ch’ellu dirige in Frameries (Belgica), cun tutti i so settori di attività tecniche, ma dinù di storia di u teatru, una vuluntà di cunniscenze di regia è di l’arte teatrale chì di solitu fermanu spiccate.
    Praticheghja assai a riscrittura di e tragedie greche accurtate in 25 minuti è spessu rapresentate cun scenugrafie di mariunette.
Quand’ellu mette à parlà di u teatru grecu, hè un sborru di erudizione ammaestratu da u prugettu di l’attualizazione in spettaculi oghjinchi. Ci vole à sente lu ammintà e vicende tante di L’Orestia : u filu tragicu è u so cuntestu sociopuliticu rinviviscenu di colpu à misura ch’ellu dice i nomi, e persone, l’istituzione è ch’ellu insegna, daretu à l’anedotticu, i slanci fundamentali di e cumunutà umane chì custruiscenu a so civilizazione.
Partendu da a riferenza mitulogica greca, face vede e ligne generale di a mitulugia, sistema universale è prupone in a so cunferenza di circà inseme, di riflette inseme à ciò chì face l’attualità di a tragedia greca oghje.