Saveriu PERALDI, prufessore d’ecunumia è analistu di a sucetà corsa d’oghje, presenta à Sampieru SANGUINETTI, giurnalistu è autore di tanti scritti d’impurtanza suciale è culturale. L’omu, indiatu in parechji duminii ed azzione à prò di e cause di l’Omu, ci porta à riflette nantu à a issu prublema à tempu maiò è cumunu in a vuciata : a viulenza in corsica. Pruchjamata a regione più criminogena di l’Europa, a Corsica, à leghje u sundame esciutu durante a statina di u 2013, hè dinù una trà e regione chì a so pupulazione ci si sente di più in securità ! Chì sarà l’origine d’issu cuntrastu trà issa presentazione è a manera ch’omu risente a viulenza in Corsica ? Di fatti u castigu d’issi umicidii mette à palesu un fenomenu ch’ellu ci vole à pruvà à interpretà s’omu u vole cuntrà. À l’incuntrariu di ciò ch’elli scrivenu o dichjaranu certi , issa viulenza ùn hè un trattu carattaristicu di l’isulani o meridiunali ch’elli sianu. In una sucetà, a viulenza hè u risultatu di i disfunziunamenti d’issa sucetà custì. Inegualità, ghjente povera, senza stantapane, chì fiasca à a scola è ch’ùn ammaestra l’ecunumia turistica : sò quesse e cundizione chì mettenu in periculu a sucetà isulana. Ùn hè micca periculosa a Corsica: hè a Corsica in periculu.