In un mondu induve a fruntiera trà i sogni è a realità s'hè squassata, l'umanità hà scupertu u mediu di materializà e so visione e più ardite. Eccu quì una fola chì splora ‘ssu mondu di dumane, ispirata da un pensà di René Char :

« Simu in u futuru. Eccu dumane chì regna oghje nant’à a terra ".

 

U mondu di dumane

 

Una volta, in u futuru, ci era un mondu induve i sogni ùn eranu più cunfinati à a notte. A ghjente pudia, per via di a forza di a so vuluntà è per via di mascine straurdinarie, dà vita à i so sogni i più scemi. Issu mondu, chjamatu Sognanzalità, era guvernatu da l'armunia trà l'imaginariu è u tucchevule.

In Sognanzalità, ogni matina, i citadini si svegliavanu cù a speranza di creà qualcosa di novu. L'architetti insignavanu casamenti chì sfidavanu a gravità, i giardini fiurianu di piante mai viste prima, è i zitelli ghjucavanu cù creature fantastiche.

Ma ‘ssu putere ùn era micca senza rispunsabilità. I sogni di certi pudianu diventà i sunniacci di l'altri. Cusì, un saviu guvernu vighjava à chì i sogni materializati cuntribuissinu à u bè cumunu è rispettessinu l'equilibriu di Sognanzalità.

Un ghjornu, una giovana, chjamata Elara, ebbe un sognu cusì putente ch’ellu minacciò di scunvoglie l'equilibriu di u mondu. Avia sunniatu d’un arburu cusì tamantu chì e so radiche si stendianu trà tuttu  Sognanzalità, è chì e so fronde eranu scremi chì i sogni di tutti eranu prugettati nantu.

I capizzoni di Sognanzalità funu divisi. Certi ci vidinu cum'è una maraviglia chì uniscerebbe tutti i sogni in un solu, mentre chì d’altri timinu ch'ellu sguassessi l'individualità di i sogni. Elara, cuscente di u dibattitu ch'ella avia cuncepitu, decise di piglià una decisione ardita.

Tandu scambiò u so sognu. L'arburu tamantu divense un locu di scontru, induve ognunu puderia sparte i so sogni senza impone li à l'altri. I screni di fronde avà mustravanu solu i sogni scelti vuluntariamente da i so creatori, celebrandu a diversità è l'unicità d’ogni visione.

Sognanzalità prusperò è a ghjente amparò à sunnià inseme, creandu un avvene induve l’imaginariu è a realità ùn facianu più chè unu. È Elara, cù u so arburu di i sogni, divense un simbulu di l'equilibriu trà u persunale è u spartutu, trà l'individuu è a cumunità.

In i carrughji sinuosi di Sognanzalità, una figura enigmatica cunnisciuta solu cum'è l'Artigianu di i Sogni s’infilava ind’è l'ombra. Vestutu d’una cappa custellata di stelle lucicante, ùn affacava chè quandu a luna era piena, offrandu à i sunnioni, frammenti di sogni à l’inforse.

L'Artigianu di i Sogni era un maestru di l'imaginariu, capace di tesse  sogni cusì reali da pudè esse tuccati è risintiti. Nimu sapia d'induve ellu venia ne quale era u so veru scopu, ma a so presenza aghjunghjia una prufundezza misteriosa à Sognanzalità.

Elara, intricata da ‘ssu persunnagiu, decise di seguità lu una notte. Scuprì chì l'Artigianu di i Sogni visitava i sogni abbandunati, quelli chì i so creatori s’eranu scurdati o  ch’elli avianu righjittati. Cù una delicatezza infinita, raccuglia ‘ssi frammenti è i trasfurmava in opere d'arte, paisaghji o meludie.

Una sera, Elara s'avvicinò d’ellu è li dumandò perchè ch’ellu facia tuttu què. L'Artigianu di i Sogni, cù un surrisu quantu misteriosu chè a so identità, rispose : « In ogni sognu scurdatu ci hè una speranza persa. L’accuncogliu per chì Sognanzalità ùn si scurdessi mai di u valore d’ogni aspirazione, puru quelle lasciate da parte. »

Dopu à ‘ssa rivelazione, Elara capì chì l'Artigianu di i Sogni era u guardianu di i sogni persi, assicurendu si chì ogni pensamentu, ogni desideriu, ogni speranza ebbe a so piazza in u mondu di dumane. È cusì, l'arburu di i sogni d’Elara divense non solu un simbulu d’unità, ma ancu un santuariu per i sogni di tutti, grazia à l'Artigianu di i Sogni.

L'Artigianu di i Sogni avia un ogettu magicu ; era un pendiloccu in forma di lacrima, appesu à una catena d'argentu. Issa cullana, chjamata u Cor’di Sognu, brillava d’una luce dolce è cambiante, riflettandu i culori di i sogni ch'ellu avia tuccati.

U Cor’di Sognu avia u putere di catturà l'essenza prufunda d’un sognu, permettendu à l'Artigianu di traspurtà lu, mudificà lu, o unisce lu cù d'altri sogni. Cù issu artefattu, pudia cusì viaghjà à traversu à i sogni di a ghjente, cum'è s'ellu attraversava purtali versu mondi scunnisciuti.

Un ghjornu, ellu cunfessò à Elara u secretu di u Cor’di Sognu. Li amparò chì l'ugettu era statu stazzunatu à partesi d’un frammentu di a prima stella mai sunniata. Era un rigalu di l'antenati, destinatu à quelli chì capiscerianu chì i sogni sò un riflessu di l'anima di u mondu.

In u silenziu d’issa notte di piena luna, l'Artigianu di i Sogni tenia trà e so mani u Cor’di Sognu, chì ragiava d'una dolce luce. D’un colpu, u pendiloccu s'illuminò, catturandu un sognu d’una bellezza incredibile.

U sognu principiava in un vallu induve i fiumi ùn scurrianu micca cù l'acqua, ma cù nastri di luce. L'arburi cantavanu antiche meludie, è e so fronde eranu farfalle di cristallu chì ballavanu per l'aria.

À u centru di u vallu s’alzava un arburu tamantone, e so rame stendendu si versu u celu cum'è per tuccà e stelle. Sottu à issu arburu tamantu, zitelli à l'ochji maliziosi custruianu castelli di nuli, ridendu è ghjucandu spenserati di u tempu chì passa.

L'Artigianu di i Sogni fighjava ‘ssu sognu cum’è un filmu, videndu i zitelli invità creature mitiche à ghjucà cun elli. I draconi facianu a corsa in u celu, l'unicorne galuppavanu nantu à archi di culori, è i fenici uffrianu spettaculi di focu è di rinascita.

Ma ciò chì rendia issu sognu unicu era l'armunia perfetta trà tutti l'esseri. Ùn ci era micca baruffe neancu paura, solu una pace prufonda è una gioia pura. U sognu era un riflessu di a speranza a più cara di l'umanità : un mondu induve a magia è a realità si scontranu, induve l'amore è a cumpressione regnanu da patroni.

L'Artigianu di i Sogni, cumossu da a purezza di ‘ssu sognu, decise di sparte lu cù Elara. Inseme cuntemplonu a scena, è u Cor’di Sognu sparse u sognu in tuttu Sognanzalità, ispirendu tutti quelli chì u vidianu à sunnià à un mondu migliore.

Cù ‘ssa rivelazione, Elara è L'Artigianu di i Sogni divensenu alliati. Inseme, apprudonu u Cor’di Sognu per arricchisce Sognanzalità, veghjandu à chì ogni sognu, grande o chjucu, fussi tenutu caru è spartutu. È u mondu di dumane saria un locu induve ogni sognu avia a pussibilità di diventà realità.

L'Artigianu di i Sogni, detentore di u Cor’di Sognu, avia una missione secreta chì u purtava à scopre i cunfini di Sognanzalità. A so cerca era di ritruvà e Sette Chiave di i Sogni, artefatti spargugliati in i sogni più profondi è scurdati di l'umanità.

Ogni chjave tenia un aspettu di a saviezza necessaria per mantene l'equilibriu trà u sognu è a realità. L'Artigianu di i Sogni avia bisognu di riunisce le, prima di a prossima Eclissa di i Sogni, un raru avvenimentu celeste induve i sogni pudianu diventà permanente, per u megliu o per u peghju.

A so prima destinazione fù u Sognu di l'Alba, induve truvò a Chjave di l'Alba, un cristallu chì brillava da l'internu cum'è s'ellu cuntenia un pezzu di u sole nascente. Issa chjave permettia di sveglià i sogni chì s’eranu addurmintati in u scordu.

A seconda chjave, a Chjave di l’Attrichjata, fù scuperta in u Sognu di a Sera, un mondu di sfumature è riflessione, induve i pinsamenti di u ghjornu si mischiavanu à e speranze di a notte. Sta chjave avia u pudere di calmà i sogni chì eranu troppu impestati.

Mentre a so cerca avanzava, l'Artigianu di i Sogni scuntrò alliati è avversari, enigme è meraviglie. Elara, cù u so arburu di i sogni, l’aiutava à interpretà l’indice è à navigà in i labirinti di i sogni.

U Valle di i Spechji era un locu induve a realità paria piegà si è torce si in modi inaspettati. I lachi eranu spechji liquidi, riflettandu micca solu e muntagne è u celu, ma ancu i sogni è i desideri di quelli chì s'aventuravanu custì.

In u centru di a valle, ci era un labirintu tuttu fattu di vetru. Ogni muru, ogni corridore, riflettia micca solu l'imaghjine, ma ancu l'anima di quellu chì ardia à entre ci. Era in ‘ssu labirintu chì ci era a Chjave di a Verità, una chjave capace di palisà l'essenza a  più pura di ogni sognu o sunniacciu.

L'Artigianu di i Sogni, guidatu da u Cor’di Sognu, intrì in u labirintu. I riflessi li mustronu in millaie di forme sferente, ognuna ripresentandu una trinca di i so sogni passati, presenti è futuri. Ebbe à  affruntà e so paure maiò è e so speranze più care per ghjunghje in u core di u labirintu.

In u Valle di i Spechji, l'Artigianu di i Sogni si truvò di fronte à un enigma incisa nantu à un petronculu induve a Chjave di a Verità ripusava.

"Sò u principiu di a fine è a fine di u tempu.

Sò essenziale à a creazione, è supraneghju e generazione.

Quale sò ? "

L'Artigianu riflesse assai, u so sguardu passandu da u so riflessu à l'enigma. Allora, cù un surrisu, disse a risposta à voce alta :

« A lettera U. Hè u principiu di ‘Ultimu’ è a fine di ‘tempU’, presente in l’‘ovU’, è supraneghju l’età : antenatU. »

À quellu mumentu, un scogliu s'alluminò è a Chjave di a Verità s'alzò pianu pianu per l'aria, dirigendu si versu L'Artigianu di i Sogni. Custì, appesa per l'aria, splendendu d'una luce chì paria cuntene tutti i culori è mancuna à listessu tempu, a Chjave di a Verità aspettava. L'Artigianu tese a manu è, cum'è i so diti tuccavanu a chjave, capì chì a verità ùn era micca una destinazione, ma un viaghju senza fine attraversu e parechje sfaccettate di Sognanzalità. Sintì un'onda di cumprensione invade lu. A chjave ùn era micca solu un ugettu, ma un invitu à vede aldilà di l’apparanze, à circà a verità in a prufundezza d’ogni sognu.

Cù a Chjave di a Verità in u so pussessu, L'Artigianu di i Sogni perseguì a so cerca, più decisu chè mai à scopre l'altre chjave è à priservà u dilicatu equilibriu di Sognanzalità.

Mentre chì l'Artigianu di i Sogni cuntinuva a so cerca à traversu i sogni di Sognanzalità, un cumpagnu inagguantevule si unì à ellu. Issu cumpagnu cunnisciutu cum’è Vighjadore di l’Ombre, un esse chì paria fattu di nebbia è di chjardiluna.

U Vighjadore di l’Ombre ùn parlava micca cù parolle, ma cumunicava per sussurri di pinsamenti è echi di sintimenti. Avia a capacità unica di spustà si trà l'ombre di i sogni, scuprendu passagi sicreti è verità piattate.

L'Artigianu di i Sogni è u Vighjadore di l’Ombre spartianu un liame prufondu, fucinatu da a so affidita à a cerca di e Sette Chjave di i Sogni. U Vighjadore di l’Ombre guidò L'Artigianu di i Sogni à traversu i periculi è i misteri di Sognanzalità, spessu prutegendu lu da e trappule spinte da i sunniacci. U Vighjadore di l’Ombre, cumpagnu inagguantevule di L'Artigianu di i Sogni, pussedia un pusere unicu è fascinante. U Vighjadore di l’Ombre avia u donu di sculà si in u bughju, diventendu una parte integrante di l’oscurità. Pudia attraversà l'ombre cum'è s'ellu viaghjava attraversu purtali, muvendu si subitu subitu da un locu à l'altru in Sognanzalità. Issu pudere li permettia di splurà i sogni più scuri è più prufondi senza esse vistu o scupertu.

Inoltre, u Vighjadore di l’Ombre avia a capacità di capisce e paure è e speranze piatte in i cori di i sunnioni. Pudia calmà i sunniacci avviluppandu li di a so nebbia luminosa, trasfurmendu e paure in visione di curagiu è di speranza.

Ma u pudere  più rimarchevule di u Vighjadore di l’Ombre era a so capacità di palisà a vera essenza di i sogni. Tuccandu una ombra, pudia palisà i desideri più secreti è e mutivazione più prufonde chì l'animavanu, offrendu à l’Artigianu di i Sogni perspettive inestimevule per a so cerca.

Inseme formavanu una squadra armuniosa, L'Artigianu di i Sogni cù u so Cor’di Sognu è u Vighjadore di l’Ombre cù a so saviezza di l'ombre. A so amicizia diventò una legenda in Sognanzalità, un esempiu di cumu ancu l'esseri più diversi si pudianu unisce si per un scopu cumunu.

In a prufundità di Sognanzalità, esistia un esse stranu è affascinante cunnisciutu cum'è u Tessaghjolu di Nebbia. Era una creatura eterea, quasi invisibile. Si muvia graziosamente à traversu Sognanzalità, lascendu daretu à ellu una traccia di nebbia d'argentu. U so corpu paria esse fattu di vapore è di luce, scambiandu sempre di forma.

Issu esse misteriosu avia u putere di intreccià a nebbia in forme è strutture cumplesse. Pudia creà ponti di nebbia per ligà i sogni luntani, o avviluppà un sunniacciu in un cucullu di nebbia per attenuì a so intensità.

U Tessaghjolu di Nebbia era ancu u guardianu di i sicreti di Sognanzalità. Racuglia i sussurri scurdati è i ricordi persi, cunservendu li in a tela di a so opera brumosa. Si dicia chì quelli chì riescianu à cumunicà cun ellu pudianu amparà i misteri piatti di i so propii sogni.

Per guadagnà a fiducia di u Tessaghjolu di Nebbia, L'Artigianu di i Sogni fù cunfruntatu à un enigma chì solu una mente veramente in sintonia cù i sogni puderia risolve.

 

"Vivu in i sogni ma mai in a realità.

Sò intesu ma mai vistu.

Principiu a notte è finiscu u ghjornu.

Quale sò ?"

 

L'Artigianu riflesse una stonda, poi, cù a certezza d'un sunnioneu abituatu, rispose :

« U silenziu. Campa in i sogni, perchè chì ghjè custì chì i nostri pinsamenti più prufondi piglianu forma senza una parolla. Si sente in u silenziu di a mente, ma mai si vede. È principia di notte, quandu u mondu hè silenziosu, è finisce di ghjornu, quandu a vita si sveglia. »

U Tessaghjolu di Nebbia, cuntentu di a risposta di L'Artigianu di i Sogni, li uffrì a so fiducia è un filu di nebbia d'argentu, una guida per aiutà lu in a so cerca di e chjave restante. Cusì, L'Artigianu di i Sogni guadagnò un alliatu preziosu è cuntinuò u so viaghju attraversu i sogni di Sognanzalità, armatu di a so saviezza è di a fiducia di u Tessaghjolu di Nebbia.

A cerca di L'Artigianu di i Sogni era più chè solu una culletta d'ogetti: era un viaghju di scuperta, un pellegrinagiu attraversu e speranze è e paure di l'umanità. È tandu, mentre ch’ellu cuntinuava a so cerca, scuntrò anime di tutti i culori, ognuna purtendu un sognu unicu. À ogni chjave ch’ellu truvò, si scrivia un novu capitulu di Sognanzalità, intrecciatu da i fili di l’imaginariu cullettivu. È cù ogni chjave truvata, Sognanzalità diventava un pocu più luminosa, un pocu più sàvia.

Infine, dopu à un longu viaghju, L'Artigianu di i Sogni stava davanti à l'ultima serratura. Cù una manu tremula, inserì l'ultima chjave, è tandu, un splendore di lume inundò Sognanzalità. I sogni è a realità si mischjonu in una sinfunia di pussibilità infinite.

L'arburu di i sogni d’Elara, cù e so fronde-screni, brillava di mille fochi, riflettendu l'aspirazione di tutti l'abitanti. L'Artigianu di i Sogni, fighjendu in giru à ellu, vidì a bellezza d’issu mondu spartutu è sappe chì a so cerca era compia.

Sognanzalità era diventata un locu induve ogni sognu avia a so piazza, induve ogni speranza cuntribuia à a tela grandiosa di a vita. È L'Artigianu di i Sogni cù i so cumpagni di cerca à u so latu, divintò u guardianu d’issu delicatu equilibriu, assicurendu si chì a fruntiera trà u sognu è a realità fermessi un passagiu, è micca una barriera.

È tutti camponu in un mondu induve ogni ghjornu era una prumessa di creazione, un umagiu à u pudere di l'imaginariu umanu.

FINE