Vultemu una cria nantu e tracce d’un’attività chì hè un pezzu ch’omu si ne hè scurdatu : u sfruttà di u calcare

A passighjata si face in duie parte : Di prima u situ di sfruttamentu duv’ellu era cacciatu u calcare, è po l’usina duv’ellu era sicatu.

Di prima si và in Venacu è si piglia u chjassu chì porta à i stazzi di Quercetu. Per istrada si trova qualchì casa falata è muraglietti è si rimarca chì u chjassu hè assestatu propiu bè. Segnu chì prima issu locu era riccu d’un’attività cumerciale impurtante.

Si gode un panorama magnificu nantu à a valle di u Vechju à manu manca. Si ghjunghje prestu nantu à u situ di l’anziana minera di marmaru di Razzu Biancu, ch’omu ricunnosce per via di una trafalata tamanta di terrenu à manu dritta. Ghjustu nanzu si passa davanti à un fornu da calcina cunservatu propiu bè.

Issu calcare l’adupravanu sopra à locu da fà a calcina viva è u sicavanu ind’è l’usina sottu à a strada (seconda parte di a visita). Sopra à trafalata, daretu à un ghjineparu ci hè un tufone prufondu. Attenti à i risichi cù i zitelli o senza u materiale à posta. Ci sò e sucetà specializate à posta chì urganizeghjanu e surtite speleulogiche propiu per quelli chì volenu visità u locu. Infurmà si in Venacu.

Da cuntinuà a visita di u marmaru, ci vole à vultà à piglià a vittura è falà torna in direzzione d’ Aiacciu. Dopu à u situ d’estrazzione miniera, andemu nantu à u situ di a sfruttera!

Ci hà da vulè à ingarà a vittura circa 500 metri prima di u ponte di u Vechju, nantu à un parcheghju rente à a strada (da a parte di u fiume) duv’ella ci hè una stela chì ramenta un accidente. Da custindi, francate u cateru (fate casu à chjode lu bè una volta passatu) falate nantu u chjassu. Ghjuntu à u pilonu eletricu, pigliate u chjassu chì fala à manca. Sarete prestu davanti à un casamentu tamantu è trafalatu in pianu.

Hè l’anziana usina da sicà u calcare strattu più insù à Razzu Biancu. Indrentu puderete truvà l’avanzi di una lastra di marmaru duv’elle ci sò e tracce di a sicheria. E mascine ci sò sempre.

L’usina hè appicciata cù un ponte magnificu à duie arche. Più inghjò sequitendu u chjassu, si sbocca davanti à un altru ponte -quessu si ne hè falatu- è chì permettia di francà u Vechju. D’altronde hè un bellisimu locu da piglià si un bagnu d’estate.

In u XVIIu seculu era solu custindi ch’omu pudia passà è andà in Aiacciu partendu da Corti !