Sarà unu trà i lavi più belli di Corsica. Cù e so puzzine, i so cavalli in libertà è i so paisaghji maestosi.

Direzzione Corti, da pudè scopre e tappe più faciule di u famosu GR20. Si parte da u rifugiu di A Bocca à Verghju, chì di regula si currisponde cù u terzu o u quartu ghjornu s’omu sequita u chjassu partendu da Calinzana.

À sente à parechji, u lavu di Ninu hè unu trà i lavi più belli di Corsica.

Hè semplice u caminu è insignatu propiu bè, cun marche rosse è bianche ch’impuntellanu l’itinerariu per quasi un’ora prima di tuccà a Bocca à San Petru à 1452 metri. Da custindi, vi taglia u rispiru a vista nantu à a sarra di U Cintu, u puntu più altu di a Corsica. A Paglia Orba è l’ochju di U Tafunatu à manca. Si vede dinù a piaghja sana sana sinu à u lavu di Calacuccia. Si cuntinueghja pè una machja corta corta.

Dopu attippatu quasi à 1900 metri, un’arretta ci stà bè. U lavu l’avemu sottu cù intondu i pozzi in una piaghja à mezu à un circulu muntagnosu. E vacche pascenu chete chete invece i cavalli in libertà passanu galuppendu. U locu pare fattu à posta pè un’arretta è un buccone da fà vi prò.

Dopu à a merendella è, da fà la falà, una passighjata à mezu à i pozzi, ci hè l’ultima tappa in direzzione di i stazzi di Vaccaghja chì permette di ghjunghje à u lavu. Custindi o si và sinu à u rifugiu è passà ci a notte prima di cuntinuà nantu à u GR. O allora si volta in daretu da rifalà à u locu da duve si hè partutu.