À quiddi tempi chì i Corsi s'imbattiani contr’à i Sarracini, vicin'à u Rizzanesu, c’era un tisoru in una sapara di u diavuli.

Issu tisoru avia un patronu: u conti Rinaldu, di Fazzà. Un ghjornu ch'eddu partiaà scumbatta incù i Sarracini, hà chjamatu u diavuli è l'hà prupostu di dà li l'animi di centu Sarracini ch’eddu tumbaria, s'eddu vulia vardà Ii u so tisoru fin'à ch’eddu volti.

« U ti vardaraghju u to tisoru. Ma s’è tu mori, saraghju ubligatu di abandunà lu.

- Sogu d'accunsentu. S’e morgu, allora ti ni pudarè andà è lacà u tisoru senza difesa. »

Rinaldu ni partì nant’à u so cavaddu, in testa à tutti i paisani chi s'erani accolti pà difenda u lucali, è si lampani in piena battaglia incù i Sarracini.

N'hè mortu tant'è tantu di i dui parti, è animi di Sarraccini, Rinaldu n'hà mandatu più di centu à u diavuli chì li tinia u so tisoru, ma hà leccu una firita murtali è avanti di mora, hà dumandatu à u so amicu Bocchineru un serviziu. Tandu un scaccanu s’hè fatu senta !

Chì sarà?

« Aghju piattatu un tisoru in a sapara di u diavuli. Andarè à circà lu. Ma ti ci voli à fà à mezanotti un pani di farina di siala, impastata inc'un cori di ziteddu, u ciarbeddu di un Sarracinu è un pezzu di candeli ch'è tu devi accenda drent'à l'arca di a ghjesgia. »

Un altru scaccanu si faci senta, è un umareddu, curnutu è incù pedi di beccu si prisintò. Era u diavuli, tuttu cuntenti chì intoppa pà i capeddi u conti Rinaldu è u si porta in infernu.

Bocchineru, l'amicu di Rinaldu, si hè invinutu di a so dumanda.

Andaria à piglià u tisoru in a sapara, ma comu fà? Avia un pocu di farina di siala, ciarbeddi di sarracini morti ùn ni mancavanu pà issi pianuri, ma comu fà pà truvà un cori di ziteddu?

Umbèh ! Vidaremu !

I Sarracini s'erani presu è imbarcatu tutti i pruvisti di u rughjonu, è ùn ci era più nudda à manghjà. Quattru ghjomi in quà a famiglia di Bocchineru hà suffertu a fami è u lindumani u so ziteddu di dui anni si n'hè mortu.

Bocchinera hà presu u criaturu, hà dittu à Ghjacuminetta, a so moglia, ch'eddu andava à intarrà lu in l'arca, ma una volta solu, l'hà cacciatu u so cori incù un culteddu.

Dopu hè andatu in ghjesgia, apartu l’arca è hè falatu drentu incù un candeli.

Battendu l'esca, l'hà accesu ma si spinghjiva sempri. A sittesima volta infini u candeli hè fermu accesu.

Ghjuntu in casa, Bocchineru s'hè missu à impastà a farina di siala incù pezzi di u cori di u so ziteddu, u ciarbeddu di un Sarracinu è una parti di a cera di u candeli. Dopu hà accesu u forru è hà fattu cocia quiddu pani.

U lindumani, hà presu a strada di a sapara di u diavuli chì l'aspittava à l'intrata :

« Chì voli tù à st'ora?

- Rinaldu hè mortu è m'hà dittu di vena à piglià u so tisoru.

- È u pani di siala, l'a'fattu?

- Eccu lu.

-Allora entri incù mecu in a sapara. vedi quì issu pracipiziu, fala drentu chì culà si trova u tisoru. Eccu una scala pà falà. »

Bocchineru hè falatu, hà impiutu i so sacchi d'oru è di diamanti in quantità è po hà vulsutu sorta ma u diavuli avia cacciatu a scala !

 

Hà capitu chì u diavuli l'avia ingannatu! Eddu da quì ùn sortaria mai. Hà pientu, s'hè rnissu à vinochju ma u diavuli ùn hà vulsutu senta nudda. A scala ùn si metti, è ti firmarè quì !

« Signori diavuli, fati mi sorta è vi docu tuttu ciò ch’è vo vuleti !

-Tuttu ciò ch'e vogliu? Allora codda puri chì mettu a scala ! »

Una volta surtitu, u diavuli dici à Bocchineru:

« A' prumissu di dà mi tuttu ciò ch'e vogliu !

- Iè, tuttu.

- Allora vogliu a to anima ! »

È, di un pussonu, l'hà fatfu cascà in u pracipiziu è, falendu, Bocchineru s'hè sciappatu u ciarbeddu.

Beddu reflessu, hè una fini malurosa pà issu povaru omu, ma si pò dinò pinsà chì pà un pocu d'oru, ùn hà avutu paura d’impastà u ciarbeddu di u so flgliolu ?

Comu sarà chì u diavuli hè sempri circhendu animi à purtà in infernu? Ùn sarà mai techju?