A BESTIA  À SETTI CAPI 

Zia Bianca avia trè figlioli. 

U più maiori li dissi un ghjornu :

-« U Rè di Francia hà promissu di marità a so figliola incù quiddu chì sarà capaci di tumbà u sarpenti à setti capi,  chì tumbava tanti ghjenti è spavintava issi lochi. Se ci ghjunghjissi divintariu un principu ; vogliu pruvà ! »

- Ùn ti n’andà, u me figliolu,  chì hè una cosa piriculosa. Tumbarà anc’à tè ! »

Ùn volsi senta nudda è ni parti,  ma in viaghju, scontra qualchì  malandrinu, è  pàpiglià li u pocu ch’edd’avia li sciappani u ciarbeddu di una fucilata..

 

U sicondu figliolu di Zia Bianca  si metti ancu eddu in viaghju ma i malandrini u tumbettini comu u so frattedu.

Allora u più ghjovanu di i frateddi, Bartolu, volsi fà com’à eddi è andà à tumbà u sarpenti.

 

Zia Bianca  era à l’addisperu  ma comu fà pà  impidisci lu. Allora si metti à fà dui fiadoni avvilanati inc’un vilenu putenti,  è dici  à Bartolu  :

-« Piglia issi dui dolci ma ch’è t’ùn ni magni mì ! chì sò incantati. Ma ti ponu serva. »

Tandu  Bartolu imbastia u so sameri Fasgianu  è si metti in viaghju.

 Dopu trè ghjorni,  u sameri muria di fami. Bartolu li taglia un pezzu di fiadonu  è u sameri u si sciacca  di colpu. À pena tastu,  casca mortu longu tiratu !

-«  Mì mì mì chì i fiadoni só murtali ! Aghju capitu parchì mamma hà dittu: “ti poni serva, ma ch’è t’ùn ni magni mì ” !.

Ė marchja, è marchja ….più di trè mesi, è un ghjornu,   vicinu à un ponti, scontra setti latri :

-«  Indu’ vai cusì dicisu ? » li dissi unu.

-Mi vulariu fà sgaiuffu è cercu qualchì  cumpagnu. »

-Allora veni incù noi in a sapara chì ci servi di piattatedda. Ma semu famiti. Chì ci hè in a to musetta ?

-Ŭn aghju chè un beddu fiadonu fattu da mamma !  S’è vo vuleti u vi docu. »

Senza fà si prigà, si spartini è s’ingoddini à a lestra u fiadonu,  è dopu essa si atturcinati di dulori, caschetini morti in terra.

 

Tandu Bartolu  intoppa i chjavi di a sapara, è drentu scopri sacchi d’oru à vulintà. Divintatu riccu di colpu, si rimetti in viaghju .

Ghjuntu sopr’à muntagna, vedi centu corbi chì si lampani nant’à i latri morti è si mettini à manghjà li !  Ma dopu à un  mumentu, i corbi erani  sdragati in terra, tutti morti anch’eddi !

-«  Umbeh ! » dissi Bartolu ridendu  ! “i fiadoni di mamma erani putenti ! »   

Scuntrendu ghjenti quì è culà, impara chì pà spusà a figliola di u Rè ùn basta à tumbà u sarpintonu, ci voli dinò à prupona à u Rè una induvinedda cusì difficile ch’eddu ùn la pudissi truvà.

-« Vidaremu. Cumincemu dighjà  pà tumbà a bestia, è dopu truvaremu l’induvinedda. »

Ghjuntu à u Palazzu Reali, pichja à a porta :

 

-« Pan pan !!

- Chì voli?

- Vogliu ved’ u Rè,  chì contu tumbà u sarpenti à setti capi è spusà a so figliola.

- A si sò pruvata più d’unu, ma tutti ani persu a vita. Ma s’è tù voli mora, hè  u to affari ! »

Ecculu davant’à u Rè, in un salonu  ch’avia  un pavimentu in oru. U Rè era pusatu nant’à  un carrigonu carcu di diamanti !

 

-« Allora tù voli spusà a me figliola ?  Ma prima ci voli à prupona mi una induvinedda.

-  Chì mi dici ?

 - Eccula :  Chì li vole dì :

-Aviu dui fiadoni

-Un pezzu hà tombu u sameri  Fasgianu

- Chì n’hà tombu setti

- Chì n’hà tombu centu.

-Ùn eru nè in celi nè in terra

-È aghju vistu un mortu chì purtava un vivu.

 

U Rè rifletti ma ùn hà pussutu  truvà a risposta. Allora dissi à Bartolu :

-«  Volta quì trè ghjorni in quà, è intantu , circaraghju à truvà a risposta. »

U Rè chjama tutt’i sapientoni di u palazzu pà aiutà lu à truvà l’induvinella ma nimu fù capaci.

 

Quandu Bartolu vultὸ trè ghjorni dopu, li dumandὸ a spiigazioni :

-« Eccu Signor’Rè ;

- Mamma m’hà datu dui fiadoni di brocciù frescu picurinu.  U me sameri avia a fami, li  n’aghju datu un pezzu è una volta manghjatu hè cascatu seccu.

 -Dopu aghju scontru setti latri. Aghju datu à tutti un pezzu di un fiadonu è à pena  manghjatu,  si ni sò morti.

 - Aghju capitu chì i fiadoni erani avvilanati.

- Dopu centu corbi si sὸ lampati nant’à i setti morti, l’ani manghjati, è só morti avvilanati  anch’eddi tutt’è  centu.

-« Và bè  pà i prima quattru. dissi u Rè . Ma i dui ultimi ? »

-Signor’Rè, hè bedda faciuli à spiigà :  Pusatu nant’à un ponti  , aghju vistu un aciddonu  neru chì falaia  pà u fiumu, postu  nant’à un branconu di castagnu.

-Dunque ùn eru nè in celi nè in terra , è u branconu mortu purtava l’aciddonu vivu. » 

 

U Rè ùn pudià  chè accittà ,a disfatta !

 

-« Bravissimu ! Ma avà cerca di tumbà a bestia. Si trova da quand’à  a  muntagna,  in un palazu scuru è bughju.  A sintarè briunà da luntanu.

-Tè! ti docu a me spada d’arghjentu. Vidaremu s’è tù ci ghjunghji . « 

 

Ghjuntu di fronti à u palazzu di u sarpintonu , Bartolu si ramenta chì u so sameri Fasgianu ùn hà manghjatu che a mità di un fiadonu avvilanatu ! L’altra mità hè ferma in u so saccu ! 

 

S’avvicina spada in manu, ma u sarpenti chì l’hà  vistu si metti in collara, incù i setti capi pisati lingua da fora, ma Bartolu si metti à briunà :

-« Só un’amicu !  T’aghju purtatu un pezzu di fiadonu chì mi ferma in u me saccu. U voli tastà ?

- Ė  comu ch’e u vogliu «  dissi a sarpi !  Dà mi lu  quì ! « 

 

Si lampa annant’a u pezzu di fiadonu è u si sciacca d’un colpu.  Tandu un capu li casca in terra, è po un’altru, è po un’altru… Faci chì in pochi mumenti, incù i setti capi longhitirati in terra lingua da fora,  u sarpintonu  rendi u fiatu !

Ùn vali a pena à cuntà a gioia di u Rè quandu impareti a bona nutizia ! U so populu pudarà campà in paci senza tema quiddu sarpintacciu maladettu.

 

Tutt’i cicconi  di u paesi sunetini  pà u matrimoniù di Bartolu incù a figliola di u Rè,  à fin’ chì tutti sappiini chè a bestia era stata tomba,  è un pranzu straurdinariu fù uffertu à tutt’a pupulazioni addunita.