UNA PROSA PUETICA DI Cathy CAMPANA

Chjodu l'ochji è trovu u bellu

 

 

Aghju fattu l'errore di cambià di camera anni fà è Morphée s'hè scordatu d'apre mi e so bracce. 

È poi sò tornata à dorme nù a mo cameruccia chì m'hà accoltu senza rimbeccu è ancu offertu u riposu ch'o circava.

In stu nidu chjucu chjucu, mi si pare di ritrovà mi in corpu di mamma, a coltra piumata m'offre a dulcezza d'issu paradisu persu.

A sera mi ne vò à accoglie i mo sogni, una grazia offerta da u celu pà cumpassione, cum'è u ricordu di i tempi beati.

A nottata spalancata nant'à avventure meravigliose permette à e brame di sfogà si.

À corre cù gioia versu i so cari voltati da l'aldilà, a suffrenza sparita, si pò gode infine di u Sale d'a terra.

A notte hè fata, face spampillulà u cumunu, u trasforma è l'arricchisce.

Stesa in cameruccia, a pensata legera piglia u volu, è si ne và induv'ellu li piace.

Mi sò messa in capu ch'o riescu à fughje, dormendu. Quandu a vita mi pesa, mi rimpattu à modu meiu, chjodu l'ochji è trovu u bellu, lascendu mi andà, ind'è u sonnu.

                                                                                           Cathy Campana