Da eri à oghje

Eri,
Scuntrà si,
Forse era tracciata
cusì la nostra sorte Eri,
Zitella eri,
Fatte à u pinnellu...
E mani dolce di l'abbracci...
Oghje,
Spiccà si,
U fà di u tempu,
Cusì la mo sorte Oghje...
Zitellu sò,
Sulignu,
L'impronte di l'abbracci
Ghjacenu in a memoria,
oramai
in core meo
piglianu a strada di u sempre,
Forse lu tempu...

Statina

Statina
Tempu di sudore
Mentre li mo sogni infiariati
Ùn possu rifiatà
M'assufocu
Po mi svegliu
È u sognu torna vita

Paisaghju

Guardà l’orizonte
à l’attrachjata
u sole more, nanzu di rinasce
per torna schjarisce un lindumane
a natura,
ogni scornu,
ogni locu,
ogni mumentu
improntu
in u palinsestu di a storia,
a storia d’ogni stonda,
quella chì sempre si rinnova…