FESTIVAL DE POESIA DE LA MEDITERRÀNIA

    U "FESTIVAL DE POESIA DE LA MEDITERRÀNIA" urganizatu in Palma di Maiorca hè unu trà l’appuntamenti maiò di a puesia. À dà li anima hè Biel MESQUIDA, direttore di u serviziu di e publicazione di l'Università di l'Isule Baleare. Hè pueta, nuvellistu, scrittore è animatore culturale. Ad ogni edizione, sò una quindecina di pueti invitati à barattà quatordeci pueti à barattà idee, versi, impressione di scontru è prugetti di rializazione cumune. Di sicuru hè l’occasione di favurizà i scontri linguistichi, i prugetti di traduzzione è d’edizione da un latu à l’altru di U Mediterraneu. A spressione corsa ci hà buscu u so postu è u scontru hà datu parechji frutti è cuntatti da una decina d’anni. A quarta edizione d’issa iniziativa l’hà accolta a prima volta cun parechje altre: di David Castillo, Francesc Garriga, Josep Lluís Aguiló, Miquel Cardell, Vicent Alonso, (catalanu), Girgis Shokry, Hassan Najmi, Zuhair Abu Shayeb (arabu), Larbi El Harti è Vicente Gallego (castiglianu), Moshe Benarroch (ebreiu), Nathalie Quintane (francese), Xènia Dyakoneva (russiu) è Ghjacumu Thiers pè u corsu.

     Una manifestazione preparata è curata da i pueti è varii associi è istituzione cunvinte chì non solu l’attività in giovu à a puesia vanu à accresce l’apertura di l’ambiente culturale nantu à u Mediterraneu, ma dinù ch’elle sò un modu impurtante di valurizà e risolse di u lucale baleare. Hè per quessa chì u patruciniu di issu festivale accolse in u 2005 a Fundació Casa Museu Llorenç Villalonga è u Departament de Cultura del Consell de Mallorca. A cunsigliera d'Educació i Cultura del Govern de les Illes Balears i Institució de les Lletres Catalanes è a Presidente di u Consell de Mallorca anu participatu à e cunferenze stampa, à e reunione publiche è a e sessione puetiche cun primura. L’affollu di isse auturità portanu testimugnanza di l’integrazione di e finalità culturale in a pulitica generale di u Guvernu baleare. Issa attitudine fruttifera di l’auturità porta à arricumandà chì l’esempiu si possi spurtà ancu da e parte nostre. Hè ghjustu di pensà ch’ellu hè quessu un mudellu di creatività pruduttiva.

       Recitali puetichi in varii punti di Palma è di i cuntorni, scontri cù i pueti lucali è recitazione cù zitelli di e scole publiche occupanu un prugrama zeppu è diviziosu in issa grande manifestazione. A ghjente di u lucale riceve è praticheghja issa festa puetica in un modu tale ch’omu induvina quanti elli sò stati l’anni di travagliu cuntinuu è decisu di l’urganizatori.
      Si ne avvede omu subitu subitu assistendu à la NIT DE LA POESIA, duv’ellu si svolge l’attu centrale di u Festivale à l’internu di u Palazzu di u Guvernu, “Pati de la Misericòrdia”. Issa « Nit de la poesia » hè propiu un mudellu da imità. In u casamentu di u Guvernu di l’isule ci hè dinù un centru culturale, i servizii di prumuzione di a lingua catalana è una grande libreria chì sparghje l’opere baleare è catalane. L’accunsentu di l’auturità publiche, presente pè ogni attu di u prugramma, si face vede ad ogni mumentu di u festivale. Ci vole à figurà si un recitale di duie ore occupate solu cù e letture puetiche davanti à un publicu di 600 persone! È cù a cunsigna pè i pueti di leghje solu in a lingua uriginale. Ci vole à dì chì à l’entrata di a serata, u publicu trova, prontu è lestu, u libru di u festivale, cù i puemi di i quatordeci participanti in lingua uriginale cun traduzzione catalana.

      Una riescita magnifica è un esempiu da seguità.