Spavechju di paglia, in u campu
duve t’hà ficcatu da guardianu
chì sà si l’omu venerà mai
à trattene si cun tè.
Eppuru a to vestura
hè stata quella di e so nozze :
a falda di u to cappellu
hà accoltu e sumente
di u granu augurale è e rosule
sfugliate pè a so sposa.
Chì sà, spavechju di paglia,
si l’omu chì t’hà postu
in guardia di u so campu
saperà mai di a to vechja brama :
perchè l’omu ùn pensa
à affiancà ti una cumpagna cum’è tè ?
Ma i spavechji anu impetti di paglia ;
i spavechji ùn anu sposa.
Ùn ci seranu nozze in u campu !
Puru si u ventu, da tantu,
t’hà prumessu di fà ti da organu ;
si a lumaca hà ricamatu
cù bavacciula d’argentu u to mantellu
è a malba aggarbata
l’hà trapuntatu di stelle viulette.
Puru si, à l’appiattu, ai dumandatu
à l’ocelli ch’è tù duveresti spaventà
d’incurunà d’alegria a to sposa.
Ùn ci seranu nozze in u campu.
Nisuna sposa ùn s’avanzerà in u campu
incurunata di voli.
Serà a spina d’un cardu
cumpagna di u sulitariu aspettà :
una spina in u to core di paglia.