Innanti ‘e connoschere a tie

Innanti ‘e connoschere a tie no ischio ite fit su fogu
ne ischio chi sa manera mezus
de faeddare esseret s’arremiu de sas manos
e su disizu de t’aer afaca.
Ne chi sos corpos che coleren sa pedde
e sigheren a esser sustantzia
poderosa dai issos etotu atesu.
E bider chi su mudine tra duos mundos,
che a narrer tue e deo, naraiat meda de prus
de custa gàlia e disvaria costumantzia
de faeddare cun sas peraulas,
m’ispanteit che chi sas àndalas
sun gai meda e chi peruna jughet a oma.
Innanti tou, no ischios de jogos
de manos chi si poden fagher cun su calore
de sa ‘uca tua e sa punta de sos didos.
E chi su cretidu donu de sa peraula
no balet nudda cando cheres faeddare cun sos alenos.